भाट्ये समुद्रकिनारी स्वच्छता अभियानात मत्स्य अभियांत्रिकी तंत्रनिकेतनचा उत्स्फूर्त सहभाग

रत्नागिरी : आंतरराष्ट्रीय किनारपट्टी स्वच्छता दिनानिमित्त इंडियन कोस्ट गार्ड, रत्नागिरीच्या वतीने भाट्ये समुद्रकिनारी आयोजित करण्यात आलेल्या स्वच्छता अभियानात मत्स्य अभियांत्रिकी तंत्रनिकेतन, शिरगाव यांच्यासह विविध संस्थांचे अधिकारी, कर्मचारी व विद्यार्थ्यांनी उत्स्फूर्त सहभाग घेतला. १९ सप्टेंबर रोजी सकाळी ७.१५ ते ९.१५ या वेळेत झरी विनायक मंदिर, भाट्ये परिसरातील किनारपट्टीवर हे अभियान राबविण्यात आले.

या स्वच्छता मोहिमेत मत्स्य अभियांत्रिकी तंत्रनिकेतन, शिरगाव, सागरी सीमा मंच, रत्नागिरी आणि सागरी जीवशास्त्रीय संशोधन केंद्र, झाडगाव येथील अधिकारी, कर्मचारी व विद्यार्थ्यांनी सहभाग घेत किनाऱ्यावर विखुरलेला प्लास्टिक कचरा, बाटल्या, पिशव्या तसेच इतर घनकचरा गोळा करून परिसर स्वच्छ केला. या उपक्रमातून किनारपट्टी स्वच्छतेसोबतच सागरी पर्यावरणाच्या संवर्धनाबाबत जनजागृती करण्यात आली.

समुद्रकिनाऱ्यावर साचणारा प्लास्टिक व अन्य घनकचरा सागरी जीवसृष्टीसाठी धोकादायक ठरू शकतो. त्यामुळे समुद्र, किनारपट्टी आणि सागरी परिसंस्थेचे संरक्षण करण्यासाठी नागरिकांनी स्वच्छतेची जबाबदारी स्वीकारणे, प्लास्टिकचा वापर कमी करणे आणि कचऱ्याची योग्य विल्हेवाट लावणे आवश्यक असल्याचा संदेश या अभियानातून देण्यात आला.

मत्स्य अभियांत्रिकी तंत्रनिकेतनाचे प्राचार्य तथा सागरी जीवशास्त्रीय संशोधन केंद्राचे वरिष्ठ वैज्ञानिक अधिकारी डॉ. केतन चौधरी यांच्या मार्गदर्शनाखाली हा उपक्रम यशस्वीपणे पार पडला. किनारपट्टी स्वच्छ ठेवणे ही केवळ प्रशासनाची जबाबदारी नसून प्रत्येक नागरिकाची सामूहिक जबाबदारी आहे, हा महत्त्वपूर्ण संदेश या अभियानातून देण्यात आला.