लातूर ( प्रतिनिधी): देशभरात गाजलेल्या नीट-युजी पेपरफुटी प्रकरणात महाराष्ट्रातील लातूर येथील नामांकित मोटेगावकर कुटुंबाला मोठा कायदेशीर व प्रशासकीय धक्का बसला आहे. राष्ट्रीय परीक्षा एजन्सीने (एनटीए) या गंभीर गैरप्रकारात अत्यंत कठोर पावले उचलत, प्रसिद्ध ‘आरसीसी कोचिंग क्लासेस’चे संचालक व रसायनशास्त्राचे शिक्षक शिवराज मोटेगावकर यांचा मुलगा आदित्य मोटेगावकर याच्यावर दोन वर्षांसाठी नीट परीक्षेला बसण्यास पूर्ण बंदी घातली आहे. एनटीएच्या या कारवाईमुळे त्याची नीट युजी २०२६ ची उमेदवारी तर तत्काळ रद्द झालीच आहे, शिवाय त्याला नीट युजी २०२७ ची परीक्षा देण्यासही पूर्णपणे अपात्र ठरवण्यात आले आहे.
३ मे २०२६ रोजी पार पडलेल्या नीट-युजी परीक्षेदरम्यान प्रश्नपत्रिका फुटल्याचा प्रकार उघडकीस आला होता. या गैरव्यवहारात आदित्य मोटेगावकर याने प्रश्नपत्रिका मिळवल्याचा अथवा ती इतरत्र सामायिक केल्याचा संशय व्यक्त करण्यात आला होता. या आरोपांवरून एनटीएने १५ जुलै रोजी त्याला कारणे दाखवा नोटीस बजावली होती. तथापि, आदित्यने आपल्यावरील सर्व आरोप फेटाळून लावत एनटीएकडे ठोस पुरावे व सीबीआयच्या अहवालाची माहिती मागितली होती. दरम्यानच्या काळात ३ मे रोजी झालेली परीक्षा रद्द करून २० जून रोजी पुनर्परीक्षा घेण्यात आली होती, आणि या फेरपरीक्षेनंतर एनटीएने आदित्यचा निकाल रोखून धरला होता.
केंद्रीय अन्वेषण विभागाच्या (सीबीआय) सखोल तपासाअंती या प्रकरणातील धक्कादायक माहिती समोर आली. सीबीआयने १७ सप्टेंबर रोजी एनटीएला पाठवलेल्या अधिकृत पत्रात आदित्य मोटेगावकर हा कथित पेपरफुटीतील थेट ‘लाभार्थी’ असल्याचे स्पष्टपणे नमूद केले होते. तपासादरम्यान आदित्यचे वडील शिवराज मोटेगावकर यांच्या मोबाईल फोनमध्ये रसायनशास्त्राच्या तब्बल १३२ हस्तलिखित प्रश्नांचे छायाचित्रे आढळून आली होती; तपासणीअंती त्यातील १११ प्रश्न एनटीएच्या अधिकृत प्रश्नसंचाशी हुबेहूब जुळल्याचे तपास यंत्रणेने न्यायालयात सिद्ध केले. सहआरोपी पी. व्ही. कुलकर्णी यांच्या विशेष वर्गांना आदित्य उपस्थित राहत होता आणि तेथूनच त्याला हे लीक झालेले प्रश्न मिळाल्याचे सीबीआयच्या तपासात निष्पन्न झाले आहे. या भक्कम पुराव्यांची आणि न्यायालयाच्या १५ सप्टेंबरच्या आदेशाची दखल घेत एनटीएच्या गैरव्यवहार प्रतिबंधक (यूएफएम) समितीने ही धडक कारवाई करत त्याला पुढील दोन वर्षांसाठी बंदी घातली आहे.
