संगमेश्वर ( प्रतिनिधी): मोबाईल फोनच्या वापरावरून कुटुंबीयांनी विचारणा केल्याच्या कारणावरून काटवली पड्याळवाडी येथे आजोळी राहणाऱ्या एका अवघ्या १२ वर्षीय बालिकेने विषारी पावडर प्राशन करून आत्महत्या केल्याची हृदयद्रावक घटना घडली आहे. अनंत चतुर्दशीच्या रात्री घडलेल्या या घटनेमुळे संबंधित कुटुंबावर दुःखाचा डोंगर कोसळला असून, संपूर्ण पंचक्रोशीत तीव्र हळहळ व्यक्त होत आहे.
मिळालेल्या माहितीनुसार, सदर चिमुरडी आपल्या आजीचा मोबाईल फोन शाळेत घेऊन गेली होती. यासंदर्भात कुटुंबीयांनी तिच्याकडे विचारणा करत तिला समजावून सांगण्याचा प्रयत्न केला. मात्र, या विचारणेचा राग मनात धरून अनंत चतुर्दशीच्या गणरायाच्या आरतीच्या सुमारास, रात्री साधारण साडे नऊ ते दहा वाजण्याच्या दरम्यान तिने विषारी पावडर प्राशन केली. उपचारादरम्यान तिचा करुण अंत झाला. उमलत्या वयातील या बालिकेच्या जाण्याने आई-वडील, आजी, मामा आणि मामी यांच्या आक्रोशाने उपस्थितांचे डोळे पाणावले.
या अविचारी आणि टोकाच्या पावलामुळे तिचे कुटुंबीय, शाळेतील मित्र-मैत्रिणी तसेच स्थानिक नागरिकांना मोठा धक्का बसला आहे. आधुनिक युगात मोबाईल फोन ही दैनंदिन गरज बनली असली तरी बालकांच्या हातातील त्याचा अनिर्बंध वापर आणि त्यातून त्यांच्या मानसिकतेवर होणारे विपरीत परिणाम ही आज प्रत्येक कुटुंबाची गंभीर समस्या बनली आहे. पालकांनी साधे समजावून सांगितले तरीही अशा टोकाच्या प्रतिक्रिया का उमटत आहेत, यावर आत्मपरीक्षण करण्याची आणि बालकांच्या समुपदेशनाची तीव्र गरज निर्माण झाल्याचे या काळ्याकुट्ट घटनेने अधोरेखित केले आहे.
