नाशिक: बैलपोळ्याच्या सणाला पुरणपोळीच्या नैवेद्यासोबत चक्क तीन तोळे वजनाची सोन्याची पोत गिळणाऱ्या बैलावर चाळीसगाव येथील पशुवैद्यकीय डॉक्टरांच्या पथकाने यशस्वी शस्त्रक्रिया करून त्याचे प्राण वाचवले आहेत. अत्याधुनिक तंत्रज्ञानाचा प्रभावी वापर करून तज्ज्ञ डॉक्टरांनी बैलाच्या पोटातील मौल्यवान दागिन्यांसह घातक प्लास्टिकचे गोळे बाहेर काढत त्याला नवे जीवनदान दिले आहे.
मालेगाव तालुक्यातील वनपट येथील शेतकरी शिवाजी बोरसे यांच्या घरी पारंपरिक पद्धतीने बैलपोळा साजरा केला जात होता. बैलांचे विधीवत पूजन करून नैवेद्य दाखवत असताना एका बैलाने नैवेद्याच्या ताटातील सुमारे तीन तोळ्यांची सोन्याची पोत फस्त केली. बोरसे यांच्याकडे दोन बैल असल्याने नेमकी सोनसाखळी कोणाच्या पोटात गेली, यावरून सुरुवातीला संभ्रम निर्माण झाला होता. गिळलेला दागिना शेणाच्या वाटे बाहेर येईल या आशेने बोरसे परिवाराने सुमारे आठ ते दहा दिवस प्रतीक्षा केली. मात्र, तसे न झाल्याने दागिन्यापेक्षा बैलाचा जीव वाचवणे अधिक महत्त्वाचे मानून त्यांनी दोन्ही बैलांना चाळीसगाव येथील तालुका पशुवैद्यकीय सर्वचिकित्सालयात तपासणीसाठी दाखल केले. तेथील डॉक्टरांनी तातडीने दोन्ही बैलांची क्ष-किरण तपासणी (एक्स-रे) केली. या तपासणीत पोत गिळलेला बैल तर स्पष्ट झालाच, शिवाय पचनसंस्थेतील नेमक्या कुठल्या भागात दागिना अडकला आहे याचेही अचूक निदान झाले.
रोगाचे नेमके स्थान स्पष्ट होताच वैद्यकीय पथकाने विलंब न लावता तातडीने क्लिष्ट शस्त्रक्रिया हाती घेतली. डॉक्टरांनी अत्यंत कौशल्याने केलेल्या या शस्त्रक्रियेदरम्यान बैलाच्या पोटातून सोन्याची माळ, त्यासोबत असलेले ६३ मणी आणि पोटातील इतर भागांत पसरलेले उर्वरित ४१ मणी सुरक्षितपणे बाहेर काढले. केवळ सोनेच नव्हे, तर चाऱ्यासोबत पोटात गेलेले टेनिस बॉलच्या आकाराचे सुमारे अर्धा किलो वजनाचे दोन प्लास्टिकचे गोळे, नायलॉनचा धागा, एक रुपयाची दोन नाणी आणि दोन रुपयांचे एक नाणे अशा अत्यंत घातक वस्तूही डॉक्टरांनी बाहेर काढल्या. डॉक्टरांच्या या समयसूचक आणि यशस्वी प्रयत्नांमुळे शेतकऱ्याचा बहुमूल्य दागिना तर परत मिळालाच, शिवाय मुक्या जनावराचे प्राणही सुखरूप वाचले.
