केज: आई-वडिलांच्या डोळ्यांतील दोन तरुण आधारस्तंभ नियतीने एका क्षणात हिरावून नेल्याने संपूर्ण अंबाजोगाई शहर सुन्न झाले असून एकाच कुटुंबातील दोन सख्ख्या भावंडांचा भीषण अपघातात जागीच दुर्दैवी अंत झाला. केज-मांजरसुंबा महामार्गावर जोला-सारुळ पाटीजवळ जनावरांची वाहतूक करणाऱ्या पिक-अप वाहनाला भरधाव टिप्परने समोरासमोर जोरदार धडक दिली. या अत्यंत हृदयद्रावक दुर्घटनेत पिक-अपच्या केबिनचा अक्षरशः चक्काचूर होऊन त्यात बसलेल्या दोन सख्ख्या भावांचा क्षणात जीव गेला, तर वाहनातील पाच मुके जीवही जागीच गतप्राण झाले. ऐन विशीत असलेल्या दोन कर्त्या मुलांचा एकाच वेळी झालेला हा करुण अंत पाहणाऱ्यांचेही काळीज पिळवटून टाकणारा ठरला आहे.
रविवार, ११ ऑक्टोबर रोजी दुपारी अडीच वाजण्याच्या सुमारास नेकनूर येथील आठवडी बाजारातून जनावरे खरेदी करून ‘एमएच ४४ यू ४३०७’ क्रमांकाचे पिक-अप वाहन अंबाजोगाईच्या दिशेने येत होते. हे वाहन केजपासून सुमारे वीस किलोमीटर अंतरावर असलेल्या रेणू पेट्रोल पंपाच्या अलीकडे जोला-सारुळ पाटीजवळ पोहोचले असता, समोरून अत्यंत वेगाने येणाऱ्या ‘एमएच ४४ यू ९५५७’ क्रमांकाच्या टिप्परने पिक-अपला समोरासमोर जोरदार धडक दिली. ही धडक इतकी भीषण होती की सुमारे अर्धा किलोमीटर अंतरावरील हॉटेलचालकांनाही त्याचा प्रचंड मोठा आवाज ऐकू आला. या भयानक आघातात पिक-अपच्या पुढच्या केबिनचा पूर्णपणे चुराडा झाला आणि त्यात बसलेले हनीफ शौकत कुरेशी (वय २०) आणि आरेफ शौकत कुरेशी (वय २०, दोघे रा. बाराभाई गल्ली, अंबाजोगाई) या दोन निष्पाप भावांचा जागीच तडफडून मृत्यू झाला. अपघातात पिक-अपमधील पाच गोवंशीय जनावरेही जागीच ठार झाली.
धडकेनंतर टिप्परचा चालक अमोल खंदारे (रा. कारेगव्हाण, ता. वडवणी) आणि उत्तर प्रदेशातील क्लिनर पप्पू यादव हे केबिनमध्ये अत्यंत वाईट पद्धतीने अडकून पडले होते. त्यांना अखेर जेसीबी यंत्राच्या साहाय्याने केबिनचा दरवाजा तोडून बाहेर काढावे लागले. दोघेही गंभीर जखमी असून त्यांना तातडीने उपचारासाठी बीड येथील रेणू हॉस्पिटलमध्ये दाखल करण्यात आले आहे. दरम्यान, मृत हनीफ कुरेशी याचा मृतदेह केज येथील उपजिल्हा रुग्णालयात, तर भाऊ आरेफ कुरेशी याचा मृतदेह नेकनूर येथील सरकारी दवाखान्यात शवविच्छेदनासाठी हलवण्यात आला असून एकाच घरातील दोन तरुण लेकरांचा असा अंत झाल्याने कुरेशी कुटुंबीयांवर दुःखाचा डोंगर कोसळला आहे. घटनेची माहिती मिळताच केज पोलीस ठाण्याचे सहायक पोलीस निरीक्षक महेश क्षीरसागर यांच्यासह पोलीस उपनिरीक्षक लक्ष्मण किर्तने, अमीरोद्दीन इनामदार, बाळासाहेब रोडे, हेडकॉन्स्टेबल बाळासाहेब अहंकारे, शिवाजी कागदे, नितीन वारे, शेख पाशा आणि गृहरक्षक दलाच्या जवानांनी तातडीने घटनास्थळी धाव घेत जेसीबीच्या साहाय्याने अपघातग्रस्त वाहने बाजूला करून ठप्प झालेली वाहतूक पूर्ववत केली.
