गावखडी (वार्ताहर): कौतुक करावे तितके थोडे, असा शिष्यवृत्ती व मंथन स्पर्धा परीक्षांचा १०० टक्के निकाल आणि सेमी इंग्रजी माध्यमातील विद्यार्थ्यांची शैक्षणिक प्रगती; मात्र एवढे घवघवीत यश मिळवूनही रत्नागिरी तालुक्यातील जिल्हा परिषद प्राथमिक शाळा मेर्वी गुरववाडीला स्वतःची इमारत न मिळाल्याने चिमुकल्यांना मोठ्या गैरसोयीचा सामना करावा लागत आहे. भौतिक सुविधांचा तीव्र अभाव असतानाही इथल्या मुलांनी गुणवत्तेत घेतलेली उत्तुंग झेप कौतुकास्पद ठरत असली, तरी हक्काच्या छताविना त्यांचा सुरू असलेला संघर्ष शिक्षण व्यवस्थेच्या कारभारावर प्रश्नचिन्ह उपस्थित करत आहे.
शाळेला सुसज्ज इमारत मिळावी यासाठी मेर्वी ग्रामपंचायतीने वरिष्ठ पातळीवर परिपूर्ण प्रस्ताव सादर करून सातत्याने पाठपुरावा केला आहे. या प्रस्तावाची गंभीर दखल घेत जिल्हा शिक्षण विभाग प्रशासनाने जावक क्रमांक रजिप/शिक्षण/प्राथ/टे.१/७८५/२०२५, दिनांक २८/०१/२०२५ च्या पत्रान्वये उद्योग व मराठी भाषा मंत्री तथा रत्नागिरीचे पालकमंत्री उदय सामंत यांच्याकडे इमारत निधी उपलब्ध करून देण्याबाबत शिफारस केली होती. मंत्रालयीन पातळीवर ही विनंती जाऊनही अद्याप या निधीला मंजुरी मिळालेली नाही. चालू सर्वसाधारण जिल्हा वार्षिक योजनेतून शाळेच्या इमारतीसाठी आवश्यक निधी तात्काळ मंजूर केला जाईल, या आशेवर आता सर्व पालकवर्ग आणि ग्रामस्थांचे डोळे पालकमंत्री उदय सामंत यांच्या निर्णयाकडे लागले आहेत.
