जयगड (प्रतिनिधी): तालुक्यातील चाफेरी बौद्धवाडी परिसरातून फेरफटका मारण्यासाठी घराबाहेर पडलेल्या एका ६५ वर्षीय वृद्धाचे अज्ञात इसमाने अपहरण केल्याची धक्कादायक घटना समोर आली आहे. सिद्धार्थ लक्ष्मण पवार (वय ६५, रा. चाफेरी बौद्धवाडी, ता. जि. रत्नागिरी) असे अपहरण झालेल्या वृद्धाचे नाव असून, या घटनेमुळे परिसरात एकच खळबळ उडाली आहे.
याप्रकरणी अपहृत वृद्धाचा मुलगा हेमंत सिद्धार्थ पवार (वय ३४, व्यवसाय-रिक्षाचालक, सध्या रा. गणेश नगर, डोंबिवली पश्चिम, मूळ रा. चाफेरी बौद्धवाडी) यांनी जयगड पोलीस ठाण्यात तक्रार दाखल केली आहे. सिद्धार्थ पवार हे मंगळवार, ६ ऑक्टोबर रोजी सकाळी १० ते ११.३० या वेळेत चाफेरी बौद्धवाडी परिसरात नेहमीप्रमाणे फेरफटका मारण्यासाठी घराबाहेर पडले होते. मात्र, त्यानंतर ते बराच वेळ घरी परतले नाहीत. नातेवाइकांनी आजूबाजूच्या परिसरात आणि परिचितांकडे कसून शोध घेतला, परंतु त्यांचा कुठेही थांगपत्ता लागला नाही. यादरम्यान कोणीतरी अज्ञात इसमाने अज्ञात कारणावरून त्यांचे अपहरण केल्याची खात्री पटल्यानंतर मुलाने पोलिसांत धाव घेतली.
या फिर्यादीवरून जयगड पोलीस ठाण्यात अज्ञात आरोपीविरुद्ध भारतीय न्याय संहिता २०२३ च्या कलम १४०(३) अन्वये अपहरणाचा गुन्हा दाखल करण्यात आला आहे. ६५ वर्षीय वृद्धाचे दिवसाढवळ्या अपहरण झाल्याने पोलीस यंत्रणा सतर्क झाली असून, या प्रकरणाचा सर्व बाजूंनी कसून शोध घेतला जात आहे. घटनेचा पुढील तपास जयगड पोलीस करत आहेत.
