रत्नागिरी: रत्नागिरी तालुक्यातील बालक आणि किशोरवयीन मुला-मुलींमधील जंतसंसर्गाचे प्रमाण पूर्णपणे रोखून त्यांचे आरोग्य अधिक सुदृढ करण्याच्या उद्देशाने, तालुका आरोग्य अधिकारी कार्यालयाच्या वतीने ‘राष्ट्रीय जंतनाशक मोहीम २०२६’ संदर्भात विशेष तालुकास्तरीय कार्यशाळेचे यशस्वी आयोजन करण्यात आले. जिल्हा आरोग्य अधिकारी डॉ. अनिरुद्ध आठल्ये यांच्या मार्गदर्शनाखाली पार पडलेल्या या कार्यशाळेत मोहिमेची सर्व उद्दिष्टे वेळेत साध्य करण्यासाठी आरोग्य विभागाच्या सर्व स्तरांतील अधिकारी व कर्मचाऱ्यांनी परस्परांच्या समन्वयाने आणि नियोजनबद्ध पद्धतीने प्रत्यक्ष मैदानावर काम करण्याचे आवाहन करण्यात आले.
या कार्यशाळेदरम्यान तालुका आरोग्य अधिकारी डॉ. शितल सूर्यवंशी, DRCHO डॉ. ठाकूर तसेच जिल्हा प्रशिक्षण केंद्राचे वैद्यकीय अधिकारी डॉ. काठोळे यांनी उपस्थित आरोग्य यंत्रणेला मोहिमेचे महत्त्व, जबाबदाऱ्या आणि प्रत्यक्ष अंमलबजावणीतील बारकाव्यांविषयी सखोल तांत्रिक मार्गदर्शन केले. यावेळी रत्नागिरी तालुक्यातील सर्व प्राथमिक आरोग्य केंद्रांचे वैद्यकीय अधिकारी, तालुका विस्तार अधिकारी, आरोग्य सहाय्यक, आरोग्य सहाय्यिका आणि गटप्रवर्तक मोठ्या संख्येने उपस्थित होते. ग्रामीण भागातील प्रत्येक पात्र घटकापर्यंत पोहोचून ही मोहीम शंभर टक्के यशस्वी करण्यासाठी प्रशासनाने निश्चित केलेल्या आराखड्यानुसार काटेकोर कार्यवाही करावी, यावर बैठकीत एकमुखाने भर देण्यात आला.
