रत्नागिरी: फक्त एक लाख रुपये भरा आणि अवघ्या एक टक्का व्याजदराने तब्बल एक कोटी रुपयांचे कर्ज मिळवा, असे मोठे आमिष दाखवून अनेक नागरिकांची लाखो रुपयांची फसवणूक केल्याचा धक्कादायक प्रकार रत्नागिरीत उघडकीस आला आहे. या आर्थिक जाळ्यात सुमारे ४० ते ४५ नागरिक अडकले असून, काही नागरिकांना तर तब्बल चार कोटी रुपयांपर्यंत कर्ज देण्याचे आश्वासन देण्यात आल्याचे समोर आले आहे. फसवणूक झालेल्या नागरिकांनी या प्रकरणी रत्नागिरी शहर पोलीस ठाण्यात तक्रार अर्ज दाखल केला असून, या संपूर्ण प्रकरणामागे मोठे आर्थिक रॅकेट कार्यरत असल्याचा संशय व्यक्त होत आहे.
तक्रारदारांनी दिलेल्या माहितीनुसार, एका महिलेने कर्ज प्रकरण मंजूर करून देण्याचा बहाणा करत नागरिकांकडून ऑनलाइन पद्धतीने प्रत्येकी एक लाख रुपये उकळले. पैसे भरल्यानंतर महिनाभराचा कालावधी उलटून गेला तरी कोणाचेही कर्ज मंजूर झाले नाही. याबाबत विचारणा केली असता संबंधितांकडून वेगवेगळ्या तारखा देऊन केवळ वेळकाढूपणा करण्यात आला. या व्यवहारावर नागरिकांचा पूर्ण विश्वास बसावा यासाठी तब्बल १५ कोटी रुपयांची मोठी रक्कम दाखवण्यात आली होती. ही रक्कम ‘बँक मनी’ असल्याचे भासवून ती गुहागर येथून आणल्याचा दावाही संशयितांकडून करण्यात आला होता, असे तक्रारीत नमूद आहे. विविध व्यक्तींमध्ये झालेल्या लाखो रुपयांच्या ऑनलाइन आर्थिक देवाणघेवाणीचे पुरावेही तक्रारदारांनी पोलिसांसमोर सादर केले आहेत. याशिवाय चार दिवसांपूर्वी गणेशगुळे फाट्यावर मध्यरात्री संशयास्पदरीत्या पैशांचे वाटप झाल्याचा दावा करत या संपूर्ण व्यवहाराची सखोल चौकशी करण्याची मागणी तक्रारदारांनी लावून धरली आहे.
कर्ज मिळणार नसल्याचे स्पष्ट झाल्यानंतर नागरिकांनी दिलेले पैसे परत मागण्यास सुरुवात केली असता, संबंधित महिलेने त्यांना चक्क जीवे मारण्याची गंभीर धमकी दिली. पोलिसांत तक्रार केल्यास किंवा १५ कोटी रुपयांच्या व्यवहाराची माहिती बाहेर सांगितल्यास गंभीर परिणाम भोगावे लागतील, असा धाक दाखवण्यासह खोटी कागदपत्रे व धनादेश तयार करून गुन्ह्यात अडकवण्याची धमकीही देण्यात आल्याचे तक्रारीत म्हटले आहे. या कथित आर्थिक गैरव्यवहारात रोख रक्कम वाहून नेण्यासाठी एका रिक्षाचा वापर झाल्याचा दावा करण्यात आला असून, लाखो आणि कोट्यवधी रुपयांची रोकड या रिक्षातून नेल्याचे तक्रारदारांचे म्हणणे आहे. त्यामुळे संबंधित रिक्षाचालक व मालकाचा शोध घेऊन त्यांचीही चौकशी करण्याची मागणी केली जात आहे. पोलिसांनी या प्रकरणाची सखोल चौकशी सुरू केल्यानंतरच या आर्थिक फसवणुकीची खरी व्याप्ती आणि सहभागी चेहरे स्पष्ट होणार असून, पोलीस आता यावर काय कारवाई करतात याकडे नागरिकांचे लक्ष लागले आहे.
