गावखडी (वार्ताहर) : रत्नागिरी तालुक्यातील साळवी नगर, गोळप सडा येथील दुर्गादेवी नवरात्रोत्सव मंडळाची वार्षिक सर्वसाधारण सभा नुकतीच उत्साही वातावरणात संपन्न झाली. आगामी नवरात्रौत्सव पारंपरिक आणि शिस्तबद्ध पद्धतीने साजरा करण्याच्या उद्देशाने आयोजित करण्यात आलेल्या या महत्त्वपूर्ण बैठकीत मंडळाच्या अध्यक्षपदी सौ. निहा आनंद साळवी यांची सर्वानुमते निवड करण्यात आली आहे.
या बैठकीत आगामी उत्सवाचे नियोजन आणि विविध धार्मिक व सांस्कृतिक कार्यक्रमांच्या रूपरेषेवर सविस्तर चर्चा करण्यात आली. नव्या कार्यकारिणीत उपाध्यक्षपदी सौ. शालिनी गुरुनाथ झगडे तर सचिवपदी सौ. सुचिता सुभाष शेलार यांची निवड जाहीर करण्यात आली. अध्यक्षपदी निवड झाल्यानंतर सौ. निहा साळवी यांनी सर्वांचे आभार मानत सर्व सदस्यांना सोबत घेऊन यंदाचा नवरात्रौत्सव मोठ्या उत्साहात व भव्य स्वरूपात साजरा करण्याचा संकल्प व्यक्त केला. या बैठकीस मंडळाचे पदाधिकारी व कार्यकर्ते शौर्या साळवी, साज साळवी, निखिल झगडे, केतन झगडे, तेजस नरवणे, तनया नरवणे, पवन झगडे, अनघा कांबळे, मुग्धा कांबळे यांच्यासह मंडळाचे इतर सर्व पदाधिकारी व ग्रामस्थ मोठ्या संख्येने उपस्थित होते. नवनिर्वाचित कार्यकारिणीचे सर्व स्तरांतून अभिनंदन करण्यात येत आहे.
