गणपतीपुळे/ वैभव पवार: राष्ट्रीय जंतनाशक मोहीम २०२६ अंतर्गत प्राथमिक आरोग्य केंद्र मालगुंडच्या कार्यक्षेत्रातील १ ते १९ वर्षे वयोगटातील एकूण २,२९५ मुलांना जंतनाशक गोळ्यांचे वाटप करण्यात येणार आहे. या मोहिमेचे नियोजन प्राथमिक आरोग्य केंद्र मालगुंडच्या वैद्यकीय अधिकारी डॉ. सुनीता पवार व डॉ. ऋषिकेश डोके यांच्या मार्गदर्शनाखाली करण्यात आले आहे.
या मोहिमेच्या प्रभावी अंमलबजावणीसाठी आरोग्य सहाय्यक डॉ. परशुराम निवेंडकर, श्री. रणसे व श्रीमती पाडवी यांनी नियोजन केले आहे. प्राथमिक आरोग्य केंद्रांतर्गत असलेल्या पाच आरोग्य उपकेंद्रांच्या माध्यमातून जंतनाशक गोळ्यांचे वाटप करण्यात येणार असून, शाळा, हायस्कूल व अंगणवाडी केंद्रांच्या माध्यमातून ही मोहीम राबविण्यात येणार आहे.
बालकांच्या आरोग्याचे संरक्षण करणे, शरीरातील कृमींचा प्रादुर्भाव कमी करणे तसेच मुलांचे पोषण आणि शारीरिक विकास सुधारण्याच्या दृष्टीने ही मोहीम महत्त्वपूर्ण आहे. या मोहिमेत पात्र मुलांना जंतनाशक गोळ्या देण्यासाठी आरोग्य विभागामार्फत आवश्यक नियोजन करण्यात आले आहे.
राष्ट्रीय जंतनाशक मोहीम दिनांक २७ ऑक्टोबर २०२६ रोजी राबविण्यात येणार असून, वंचित राहिलेल्या पात्र मुलांसाठी ३ नोव्हेंबर २०२६ रोजी मॉप-अप दिन आयोजित करण्यात आला आहे.
मुलांच्या आरोग्याच्या दृष्टीने पालक, शिक्षक, अंगणवाडी सेविका व आरोग्य कर्मचाऱ्यांनी या मोहिमेला सहकार्य करावे, असे आवाहन प्राथमिक आरोग्य केंद्र मालगुंडच्या वैद्यकीय अधिकारी व आरोग्य विभागामार्फत करण्यात आले आहे.
