रत्नागिरी: आपल्या लेखणीच्या आणि सक्रिय समाजकार्याच्या बळावर वेगळा ठसा उमटवणारे रत्नागिरी शहरातील पत्रकार ‘कोकणरत्न’ जमीर खलफे यांच्या शिरपेचात आणखी एक मानाचा तुरा रोवला गेला असून, ‘वर्ल्ड फॉर नेचर इंडिया’ या संस्थेने त्यांना यंदाचा ‘राज्यस्तरीय आदर्श पत्रकार पुरस्कार २०२६’ घोषित केला आहे.
गेली कित्येक वर्षे पत्रकारिता जगतात प्रामाणिकपणे बजावलेली सेवा आणि सर्वसामान्यांच्या हितासाठी केलेले सामाजिक कार्य यांमुळे त्यांना यापूर्वी अनेक प्रतिष्ठेच्या पुरस्कारांसह ‘कोकणरत्न’ पदवीने गौरविण्यात आले आहे. मराठी पत्रकार परिषद रत्नागिरी शाखेचे सचिव पद अत्यंत सक्षमपणे सांभाळण्यासोबतच, संपर्क युनिक फाउंडेशन या सामाजिक एनजीओचे रत्नागिरी जिल्हाध्यक्ष आणि सैतवडे सोशल वेल्फेअर सोसायटीचे सचिव म्हणून त्यांनी विविध लोककल्याणकारी उपक्रम सातत्याने तळागाळापर्यंत पोहोचवले आहेत. त्यांच्या पत्रकारितेतील व सामाजिक क्षेत्रातील या भरीव योगदानाबद्दल जाहीर झालेल्या या राज्यस्तरीय पुरस्काराचे सर्वच स्तरांतून जोरदार स्वागत होत असून त्यांच्यावर कौतुकाचा वर्षाव सुरू आहे.
हा बहुमान प्रदान करण्याचा भव्य पुरस्कार वितरण सोहळा २२ नोव्हेंबर रोजी चिपळूण येथे मोठ्या दिमाखात संपन्न होणार असून, उपस्थित मान्यवरांच्या शुभहस्ते जमीर खलफे यांना हा पुरस्कार देऊन सन्मानित केले जाईल.
