रत्नागिरी (अजय सावंत): नाचणे ग्रामपंचायत हद्दीतील वर्दळीच्या रस्त्यावरील अपघाताचा गंभीर धोका अखेर टळला असून, ‘ग्रामीण वार्ता’च्या दणक्यानंतर ग्रामपंचायत प्रशासनाने गतिमान पावले उचलत मुख्य वळणावरील जीवघेणा खड्डा काँक्रीटीकरण करून सपाट केला आहे. गणेश कॉलनीकडून सह्याद्री नगरकडे जाताना जनरल स्टोअर्सनजीकच्या पहिल्या डाव्या वळणावरच पडलेला हा खड्डा इतका खोल होता की, समोरून वेगात येणाऱ्या वाहनांना त्याचा अंधारात अथवा वळणावर कोणताही अंदाज येत नव्हता. परिणामी शालेय बस, दुचाकी व चारचाकी वाहनांचा तोल जाऊन मोठ्या अपघाताची भीती सातत्याने व्यक्त होत होती.
या मार्गावरील पादचारी व वाहनचालकांची सुरक्षा धोक्यात आल्याने स्थानिक ग्रामस्थांमध्ये तीव्र असंतोष पसरला होता. या समस्येचे गांभीर्य ओळखून १ ऑक्टोबर रोजी ‘ग्रामीण वार्ता’ने प्रत्यक्ष वस्तुस्थिती मांडणारे वृत्त प्रसिद्ध करून प्रशासनाला खडबडून जागे केले. या वृत्ताची दखल घेत माजी ग्रामपंचायत सदस्य संकेत कदम यांनी तातडीने ग्रामपंचायतीकडे पाठपुरावा करून काम मार्गी लावण्याची मागणी लावून धरली. प्रशासनानेही परिस्थितीचे गांभीर्य ओळखून २ ऑक्टोबर रोजी संबंधित वळणावरील मुख्य खड्ड्यासह परिसरातील अन्य खड्ड्यांवर सिमेंट काँक्रीटचा मुलामा देऊन रस्ता पूर्ववत वाहतूकयोग्य केला. दुर्घटनेची वाट न पाहता समस्येला वाचा फोडल्याबद्दल नागरिकांनी ‘ग्रामीण वार्ता’प्रती कृतज्ञता व्यक्त केली असून, अवघ्या दुसऱ्याच दिवशी कामाची पूर्तता केल्याबद्दल नाचणे ग्रामपंचायतीच्या तत्पर कारभारावरही समाधानाची मोहोर उमटली आहे.
