मुंबई : गुजरातमधील एका नागरिकाला तब्बल तीन महिने कथित ‘डिजिटल अरेस्ट’मध्ये डांबून ठेवून त्याच्याकडून ११ कोटी ४२ लाख रुपयांची प्रचंड खंडणी उकळल्याचा धक्कादायक प्रकार उघडकीस आला आहे. सर्वोच्च न्यायालयाच्या कडक निर्देशानंतर डिजिटल अरेस्टशी संबंधित मोठ्या सायबर गुन्ह्यांचा तपास हाती घेतलेल्या केंद्रीय अन्वेषण विभागाने (सीबीआय) या प्रकरणी हिमांशू प्रसाद आणि युनिस बिस्वास या दोघांना अटक केली आहे. आरोपी सायबर भामट्यांनी पीडित व्यक्तीशी संपर्क साधून आपण भारतीय दूरसंचार नियामक प्राधिकरण (ट्राय) तसेच पोलीस दलातील उच्चपदस्थ अधिकारी असल्याचे भासवले होते. त्यानंतर गंभीर कायदेशीर कारवाईची दहशत दाखवत त्यांनी पीडिताला वारंवार मानसिक दबावाखाली ठेवले आणि टप्प्याटप्प्याने कोट्यवधी रुपये वेगवेगळ्या खात्यांवर हस्तांतरित करण्यास भाग पाडले.
या आंतरराज्यीय सायबर टोळीचा पर्दाफाश करण्यासाठी सीबीआयने देशपातळीवर ‘ऑपरेशन चक्र-६’ राबवत तब्बल १० राज्यांतील २२ संशयास्पद ठिकाणांवर एकाच वेळी धडक छापे टाकले. या व्यापक शोधमोहिमेदरम्यान संशयितांकडून गुन्ह्याशी संबंधित महत्त्वाची बँकिंग कागदपत्रे, बँक खात्यांचे व्यवहाराचे रेकॉर्ड आणि डिजिटल पुरावे मोठ्या प्रमाणावर जप्त करण्यात आले आहेत. सर्वोच्च न्यायालयाच्या आदेशानंतर सीबीआयने देशभरात सुरू केलेल्या या धडक कारवाईमुळे बनावट डिजिटल अरेस्टचे जाळे चालवणाऱ्या आंतरराज्यीय सायबर माफियांमध्ये मोठी खळबळ उडाली आहे.
