मेरा युवा भारत आणि स्वामी बाळ सत्यधारी महाराज व्यसनमुक्ती केंद्राचा संयुक्त पुढाकार
रत्नागिरी : सक्षम, सुदृढ आणि व्यसनमुक्त भावी पिढीच्या माध्यमातून सशक्त राष्ट्र उभारणीचा संकल्प घेऊन आयोजित करण्यात आलेल्या ‘नशामुक्त युवा फॉर विकसित भारत’ या प्रबोधनपर उपक्रमाला रत्नागिरीतील युवकांचा प्रचंड प्रतिसाद लाभला. ‘मेरा युवा भारत’ आणि स्वामी बाळ सत्यधारी महाराज व्यसनमुक्ती केंद्र यांच्या संयुक्त विद्यमाने या विशेष मार्गदर्शन शिबिराचे आयोजन करण्यात आले होते. देशाच्या सर्वांगीण प्रगतीसाठी निरोगी शरीर, व्यसनमुक्त जीवनशैली आणि सुदृढ मानसिक आरोग्य काळाची गरज असल्याचे या वेळी अधोरेखित करण्यात आले.
कार्यक्रमात नेहरू युवा केंद्राचे जिल्हा युवा अधिकारी सम्राट पाटील यांनी उपस्थित तरुणांना व्यसनमुक्ती आणि आरोग्य संवर्धनाचे महत्त्व पटवून दिले. निरोगी आणि सजग युवाशक्ती हीच विकसित भारताचा पाया असून, तरुणांनी कोणत्याही प्रकारच्या व्यसनाधीनतेपासून स्वतःला दूर ठेवून आपल्या ऊर्जेचा वापर देश उभारणीसाठी करावा, असे आवाहन त्यांनी केले. या प्रसंगी जिल्हा माहिती अधिकारी प्रशांत सातपुते यांनी प्रमुख उपस्थिती दर्शवून, तरुणांमध्ये सकारात्मक विचार पेरण्यासाठी आणि योग्य माहिती पोहोचवण्यासाठी शासकीय यंत्रणा कटिबद्ध असल्याचे स्पष्ट केले.
बदलत्या काळात पारंपरिक अमली पदार्थांच्या व्यसनासोबतच तरुणाईला ग्रासणाऱ्या डिजिटल धोक्यांवरही या शिबिरात प्रकाश टाकण्यात आला. या पार्श्वभूमीवर रत्नागिरी सायबर पोलीस ठाण्याच्या पोलीस निरीक्षक स्मिता सुतार यांनी विद्यार्थ्यांना ऑनलाइन सुरक्षितता आणि सायबर गुन्हेगारीच्या विळख्यातून कसे सावध राहावे, याबाबत मार्गदर्शन केले. सायबर जगतातील आमिषे आणि धोक्यांविषयी त्यांनी विविध उदाहरणांसह माहिती दिली. तरुणांना अधिक जबाबदार, निरोगी आणि सजग नागरिक बनवण्याच्या दिशेने टाकलेले हे पाऊल अत्यंत परिणामकारक ठरल्याचे उपस्थितांनी व्यक्त केले. या प्रबोधनपर उपक्रमाला परिसरातील शेकडो युवक-युवतींनी उपस्थित राहून उत्स्फूर्त सहभाग नोंदवला.
