बारामती: बारामती तालुक्यातील शेरेवाडी येथे मंगळवारी पहाटे मानवतेला काळीमा फासणारी मन पिळवटून टाकणारी घटना उघडकीस आली आहे. घराच्या पडवीत गाढ झोपेत असलेल्या दोन निष्पाप वृद्ध महिलांवर चोरट्यांनी अचानक जीवघेणा हल्ला चढवून त्यांची निर्घृण हत्या केली आणि अंगावरील सोन्याचे दागिने ओरबाडून पळ काढला. कृष्णाबाई लडकत (वय ६५) आणि इंदुमती लडकत (वय ७५) अशी खून झालेल्या दुर्दैवी ज्येष्ठ महिलांची नावे असून, या भयंकर घटनेमुळे संपूर्ण परिसरात तीव्र हळहळ आणि संताप व्यक्त होत आहे.
पोलिसांनी दिलेल्या माहितीनुसार, दोघीही महिला रात्री नेहमीप्रमाणे घरच्या पडवीत झोपलेल्या असताना चोरट्यांनी लोखंडी सेफ्टी दरवाजा उघडण्याचा प्रयत्न केला. आवाजाने दोघींना जाग आली आणि त्यांनी घराचे रक्षण करण्यासाठी चोरट्यांना प्रतिकार करण्याचा प्रयत्न केला. मात्र, दागिन्यांच्या हव्यासापोटी निर्दयी बनलेल्या चोरट्यांनी या असहाय्य महिलांवर थेट हल्ला चढवला, ज्यामध्ये त्यांचा जागीच दुर्दैवी मृत्यू झाला. निष्पाप जिवांचा बळी घेतल्यानंतर चोरटे दोघींच्या अंगावरील सोन्याचे दागिने घेऊन अंधाराचा फायदा घेत फरार झाले.
या थरारक हत्येची माहिती मिळताच वरिष्ठ पोलीस अधिकारी, न्यायवैद्यक पथक आणि श्वान पथकाने तातडीने घटनास्थळी धाव घेऊन तपासासाठी आवश्यक पुरावे संकलित केले. हा प्रकार निव्वळ चोरीच्या उद्देशाने करण्यात आला असावा, असा प्राथमिक अंदाज पोलिसांनी व्यक्त केला आहे. हल्लेखोरांनी घरात प्रवेश कसा केला, केवळ या दोन महिलांनाच लक्ष्य करण्यामागे नेमके काय कारण होते, हा हल्ला पूर्वनियोजित होता का, हल्लेखोर या महिलांच्या ओळखीचे होते का आणि ओळख पटू नये म्हणूनच हा हल्ला करण्यात आला का, अशा सर्व शक्यता लक्षात घेऊन पोलीस तपास करत आहेत.
घटनेत आणखी कोणाचा सहभाग आहे का याचाही कसून शोध घेतला जात असून, आरोपींचा माग काढण्यासाठी विविध तपास पथके रवाना करण्यात आली असल्याची माहिती पुणे ग्रामीणचे पोलीस अधीक्षक संदीप सिंह गिल यांनी दिली आहे. शांत झोपेत असताना दागिन्यांच्या लोभापायी संपवल्या गेलेल्या या दोन ज्येष्ठ महिलांच्या मृत्यूने शेरेवाडीसह संपूर्ण तालुक्यात शोककळा पसरली आहे.
