दुबईहून आलेल्या तिघांना बेड्या; तब्बल १४.८१ कोटींचे ९.४० किलो सोने जप्त
मुंबई : तस्करीसाठी गुन्हेगारांनी शोधून काढलेली एक अत्यंत धक्कादायक आणि अनोखी शक्कल छत्रपती शिवाजी महाराज आंतरराष्ट्रीय विमानतळावर महसूल गुप्तचर संचालनालयाने (डीआरआय) उघडकीस आणली आहे. दूध पावडर, ओट्स, नारळाच्या दुधाची पावडर, विविध प्रकारचे पीठ आणि न्यूटेला यांसारख्या दैनंदिन खाद्यपदार्थांच्या पाकिटांत सोन्याची बारीक भुकटी मिसळून आणलेले सुमारे १४.८१ कोटी रुपयांचे ९.४० किलो विदेशी सोने सीमा शुल्क विभागाच्या सहकार्याने जप्त करण्यात आले आहे. याप्रकरणी दुबईहून आलेल्या तीन भारतीय प्रवाशांना ताब्यात घेण्यात आले आहे.
विमानतळावर उतरलेल्या प्रवाशांकडे वरवर पाहता साधे खाण्याचे जिन्नस वाटावेत अशा पॅकेटमध्ये ही भुकटी लपवण्यात आली होती. संबंधित पदार्थांचा रंग, पोत आणि स्वरूप सोन्याच्या भुकटीसारखेच जुळणारे असल्याने सर्वसामान्य तपासणीत संशय येऊ नये, अशी अत्यंत पद्धतशीर रचना तस्करांनी केली होती. ‘डीआरआय’च्या मुंबई विभागाला मिळालेल्या ठोस गुप्त माहितीच्या आधारे अधिकाऱ्यांनी दुबईवरून आलेल्या या तिघांना रोखून त्यांच्या सामानाची कसून तपासणी केली असता, एकूण ३३.५० किलो वजनाच्या खाद्यपदार्थांमध्ये ही सोन्याची भुकटी कौशल्याने मिसळल्याचे समोर आले.
अधिकाऱ्यांनी केलेल्या सखोल चौकशीत तिन्ही संशयित आरोपींनी एकाच संघटित तस्करी टोळीसाठी वाहक म्हणून काम करत असल्याची कबुली दिली आहे. आंतरराष्ट्रीय विमानतळांवर नियमित तपास यंत्रणांची दिशाभूल करण्यासाठी वापरण्यात येणाऱ्या अशा नवनवीन क्लृप्त्यांचा पर्दाफाश करत यंत्रणेने कोट्यवधींच्या तस्करीचा मोठा कट उधळून लावला असून या टोळीच्या मुख्य सूत्रधारांचा शोध सुरू आहे.
