गणपतीपुळे (वैभव पवार): रत्नागिरी तालुक्यातील प्रसिद्ध तीर्थक्षेत्र आणि लाखो भाविकांचे श्रद्धास्थान असलेल्या श्री क्षेत्र गणपतीपुळे येथे मंगळवारी, २९ सप्टेंबर रोजी अंगारकी चतुर्थी यात्रोत्सव उत्साहात पार पडला. या पर्वावर पश्चिम महाराष्ट्र, घाटमाथा आणि विदर्भातून आलेल्या भाविकांनी स्वयंभू गणेशाच्या चरणी लीन होत ‘महाराष्ट्रावरील दुष्काळाचे संकट दूर होऊ दे आणि बळीराजाला सुगीचे दिवस येऊ दे,’ असे भावपूर्ण साकडे घातले.
चालू वर्षातील तिसऱ्या अंगारकीचा दुर्मिळ योग जुळून आल्याने लाखो भाविक दाखल होतील असा प्राथमिक अंदाज वर्तवण्यात आला होता. मात्र, राज्यातील अनेक भागांत ओढवलेले दुष्काळाचे सावट, नुकताच संपलेला गणेशोत्सव आणि सुरू असलेला पितृपंधरवडा या तिहेरी कारणांमुळे गर्दीवर मोठा परिणाम जाणवला. देवस्थानचे मुख्य पुजारी अमित घनवटकर यांनी दिलेल्या माहितीनुसार, यंदा गर्दीत सुमारे ३५ ते ४० टक्क्यांची घट दिसून आली. एरवी अशा योगाला ७० ते ८० हजार भाविक उपस्थित राहण्याची शक्यता वर्तवली जात असताना, यंदा सुमारे ४० ते ५० हजार भाविकांनीच गणरायाचे मनोभावे दर्शन घेतले.
भाविकांची उपस्थिती अपेक्षेपेक्षा कमी असली, तरी दर्शनासाठी आलेल्या प्रत्येक भाविकाच्या प्रार्थनेत दुष्काळमुक्तीची आर्तता स्पष्टपणे जाणवत होती. विदर्भ आणि दुष्काळग्रस्त भागातून आलेल्या भाविकांनी स्वतःच्या सुख-समृद्धीसह राज्यातील शेतकऱ्यांच्या चिंतेचे निवारण व्हावे, शेतशिवार पुन्हा हिरवेगार व्हावे, यासाठी विघ्नहर्त्या चरणी नतमस्तक होऊन प्रार्थना केली. दर्शनासाठी देवस्थान व स्थानिक प्रशासनाच्या वतीने भाविकांना सुरक्षित आणि सुलभ दर्शन घडेल यासाठी चोख नियोजन करण्यात आले होते.
