खेड: महाराष्ट्र शासनाच्या ‘सेवा संकल्प अभियान’ उपक्रमाचे औचित्य साधत सहकार विभागाने सामाजिक बांधिलकीचे दर्शन घडवले आहे. सहाय्यक निबंधक सहकारी संस्था, खेड आणि खेड तालुका नागरी सहकारी पतसंस्था संघ (फेडरेशन) यांच्या संयुक्त विद्यमाने असोंड येथील संत गाडगेबाबा भटक्या व विमुक्त जाती माध्यमिक आश्रमशाळेतील विद्यार्थ्यांच्या पोषणासाठी दोन महिन्यांचा किराणा नुकताच सुपूर्द करण्यात आला. विद्यार्थ्यांची वाढ आणि सर्वांगीण विकास सकस आहारावर अवलंबून असतो, ही संवेदनशीलता ओळखून राबवलेल्या या उपक्रमाचे सर्व स्तरांतून कौतुक होत आहे.
समाजातील वंचित आणि गरजू घटकांच्या विकासात सहकार क्षेत्राला आपला खारीचा वाटा उचलता आला, ही अत्यंत समाधानाची बाब असल्याचे या प्रसंगी मान्यवरांनी नमूद केले. या मदत वाटप कार्यक्रमाला खेडच्या सहाय्यक निबंधक (सहकारी संस्था) योगिता मुरडे यांची प्रमुख उपस्थिती लाभली. याशिवाय खेड तालुका नागरी सहकारी पतसंस्था संघाचे अध्यक्ष वसंत पिंपळकर, कार्याध्यक्ष अभिनय महाजन, उपाध्यक्ष संदीप मोदी, सचिव रमाकांत पाटील, संचालक तथा श्री संतसेना नाभिक व्यावसायिक नागरी सहकारी पतसंस्थेचे मुख्य कार्यकारी अधिकारी संदीप तांबे, जनकल्याण नागरी सहकारी पतसंस्थेचे मुख्य कार्यकारी अधिकारी दिनेश पाटील, सदस्या श्रावणी आंबेडे आणि स्नेहा हळदे उपस्थित होते.
कार्यक्रमाचे नेटके नियोजन व उपस्थितांचे आभार आश्रमशाळेचे अधीक्षक संतोष हांडे यांनी मानले. या वेळी शाळेतील सर्व शिक्षकवृंद, शिक्षकेतर कर्मचारी आणि विद्यार्थी मोठ्या संख्येने उपस्थित होते. वंचित घटकांतील विद्यार्थ्यांप्रती सहकार विभागाने दाखवलेल्या या संवेदनशीलतेमुळे आश्रमशाळेतील मुलांच्या आरोग्याला व आहाराला मोठा हातभार लागला आहे.
