गुहागर : पर्यावरण रक्षण आणि प्लास्टिकमुक्तीचा ठोस संदेश देत पाटपन्हाळे हायस्कूल परिसर व शृंगारतळी भागात ‘स्वच्छता ही सेवा’ अभियान अत्यंत उत्साहात पार पडले. महाराष्ट्र शासनाच्या ‘सेवा संकल्प अभियान – सेवा माझे योगदान’ या उपक्रमाचे औचित्य साधून गुहागर तालुका सहकारी अधिकारी (श्रेणी-१) कार्यालय आणि पाटपन्हाळे विविध कार्यकारी सेवा सहकारी संस्था यांच्या संयुक्त पुढाकाराने या व्यापक जनजागृती कार्यक्रमाची आखणी करण्यात आली होती.
केवळ घोषणांपुरते मर्यादित न राहता प्रत्यक्ष कृतीवर भर देत राबवण्यात आलेल्या या मोहिमेत विद्यार्थ्यांनी आणि स्थानिक ग्रामस्थांनी उत्स्फूर्त सहभाग नोंदवला. यावेळी उपस्थितांना प्लास्टिक कचऱ्यामुळे निसर्गावर होणारे घातक दुष्परिणाम स्पष्ट करून सांगण्यात आले. सोबतच कचरा वर्गीकरण आणि कंपोस्टिंग प्रक्रियेचे महत्त्व पटवून देत सविस्तर मार्गदर्शन करण्यात आले. दैनंदिन वापरातून प्लास्टिक हद्दपार व्हावे यासाठी पाटपन्हाळे विकास संस्थेच्या वतीने नागरिक आणि विद्यार्थ्यांना कापडी पिशव्यांचे वाटप करून पर्यावरणपूरक पर्यायांचा अवलंब करण्याचे आवाहन करण्यात आले.
या स्वच्छता मोहिमेदरम्यान स्वयंसेवकांनी पाटपन्हाळे परिसरात विखुरलेला प्लास्टिक व इतर कचरा गोळा करून त्याचे शास्त्रोक्त वर्गीकरण केले. संकलित झालेला हा कचरा योग्य व्यवस्थापनासाठी आणि पुढील विल्हेवाटीसाठी पाटपन्हाळे ग्रामपंचायतीच्या कचरा गाडीकडे सुपूर्द करण्यात आला.
परिसराच्या स्वच्छतेसाठी आयोजित या मोहिमेत सुमारे ७० हून अधिक जण प्रत्यक्ष सहभागी झाले होते. यामध्ये पाटपन्हाळे विकास संस्थेचे चेअरमन, संचालक मंडळ, सभासद, शृंगारतळीचे नागरिक, गुहागर तालुक्यातील सहकारी संस्थांचे सचिव, हायस्कूलचे शिक्षक, विद्यार्थी यांच्यासह रत्नागिरी जिल्हा मध्यवर्ती सहकारी बँकेचे अधिकारी, कर्मचारी व लेखापरीक्षक मोठ्या संख्येने उपस्थित होते, अशी माहिती तालुका सहकारी अधिकारी (श्रेणी-१) प्रियांका माने यांनी दिली.
