नागपूर : उज्ज्वल भविष्याची स्वप्ने उराशी बाळगून शिक्षणासाठी घराबाहेर पडलेल्या एका 19 वर्षीय विद्यार्थिनीवर भररस्त्यात काळाने घाला घातला. मानकापूर परिसरातील गोधनी-झेंडा चौक मार्गावर मंगळवारी सायंकाळी भरधाव डंपरने ई-स्कूटरला दिलेल्या भीषण धडकेत मुस्कान देवाचंद खियालदासानी (वय 19, रा. जरीपटका) या बी.टेक. विद्यार्थिनीचा डंपरच्या मागील चाकाखाली चिरडून जागीच अत्यंत हृदयद्रावक मृत्यू झाला. बोखारा येथील झुलेलाल इन्स्टिट्यूट ऑफ टेक्नॉलॉजीमध्ये बी.टेक.च्या द्वितीय वर्षात शिक्षण घेणाऱ्या मुस्कानचा असा अचानक आणि अकाली अंत झाल्याने तिच्या कुटुंबीयांवर दुःखाचा डोंगर कोसळला असून, जरीपटका परिसरासह तिच्या मित्रमैत्रिणींमध्ये तीव्र शोक व्यक्त होत आहे.
मंगळवारी सायंकाळी पावणेसहा ते सहा वाजताच्या सुमारास मुस्कान ही तिची मैत्रीण राजलक्ष्मी लोखंडे हिच्यासोबत ई-स्कूटरने गोधनी-झेंडा चौक रस्त्यावरून जात होती. त्यावेळी पाठीमागून अत्यंत वेगाने आलेल्या एका डंपरने त्यांच्या ई-स्कूटरला जोरदार धडक दिली. हा अपघात इतका भीषण होता की दोघीही रस्त्यावर फेकल्या गेल्या. यात पाठीमागे बसलेली मुस्कान रस्त्याच्या उजव्या बाजूला पडली आणि डंपरचा मागील भाग तिच्या अंगावरून गेल्याने गंभीर जखमी होऊन तिचा जागीच जीव गेला, तर ई-स्कूटर चालविणारी राजलक्ष्मी जखमी झाली असून तिच्यावर उपचार करण्यात आले आहेत. अपघात घडताच स्थानिक नागरिकांनी घटनास्थळी धाव घेत मदतीचा प्रयत्न केला, मात्र तोपर्यंत उशीर झाला होता.
अपघातानंतर माणुसकीला काळीमा फासत डंपर चालकाने घटनास्थळावरून पळ काढण्याचा प्रयत्न केला. मात्र, संतप्त स्थानिक नागरिकांनी पोलिसांच्या मदतीने तत्परता दाखवत पाठलाग करून डंपर अडवला आणि चालकाला वाहनासह पोलिसांच्या ताब्यात दिले. दामोदर सिताराम सहारे (वय 61, रा. नारी-कपिल नगर) असे ताब्यात घेतलेल्या चालकाचे नाव आहे. या प्रकरणी मानकापूर पोलिसांनी घटनास्थळाची पाहणी करून परिसरातील सीसीटीव्ही फुटेज आणि प्रत्यक्षदर्शींच्या जबाबाच्या आधारे तपास सुरू केला असून, चालकाकडून वेगमर्यादा आणि वाहतूक नियमांचे उल्लंघन झाले होते का, याचाही सखोल तपास केला जात आहे.
