ठाणे: ठाण्यातील मनोरमानगर येथील पक्षाच्या शाखेसमोरच उद्धवसेनेचे निष्ठावंत शाखाप्रमुख प्रदीप पूर्णेकर (वय ४७) यांची मंगळवारी रात्री ९:३० ते ९:४५ वाजेच्या सुमारास अज्ञाताने गोळ्या झाडून निर्घृण हत्या केली. ज्या शाखेच्या दारात उभे राहून त्यांनी वर्षानुवर्षे लोकांची कामे केली, त्याच शाखेच्या उंबरठ्यावर रक्ताच्या थारोळ्यात त्यांचा जीव गेल्याची ही काळीज पिळवटून टाकणारी घटना समोर येताच ठाण्यातील राजकीय वर्तुळात प्रचंड खळबळ उडाली असून सर्वत्र हळहळ व्यक्त होत आहे.
माजी नगरसेवक जयनाथ पूर्णेकर यांचे ते बंधू होते. मंगळवारी रात्री अज्ञात हल्लेखोराने दबा धरून प्रदीप यांच्यावर अचानक दोन फैरी झाडल्या. गोळ्या लागताच ते गंभीर जखमी अवस्थेत जमिनीवर कोसळले, तर हल्लेखोर अंधाराचा फायदा घेऊन तिथून पसार झाला. रक्ताच्या थारोळ्यात पडलेल्या प्रदीप यांना स्थानिकांनी जिवाच्या आकांताने कापूरबावडी भागातील आर मॉलजवळील इन्फिनिटी हॉस्पिटलमध्ये तातडीने दाखल केले; मात्र डॉक्टरांनी उपचारापूर्वीच त्यांना मृत घोषित केले आणि एका क्षणात संपूर्ण कुटुंब उघड्यावर आले.
या प्राणघातक हल्ल्यामागील नेमके कारण लगेच स्पष्ट होऊ शकलेले नाही. हल्लेखोर कोण होता आणि कोणत्या कारणासाठी त्याने हा गोळीबार करून प्रदीप यांचा जीव घेतला, याबाबत कापूरबावडी पोलिसांनी वेगाने तपास सुरू केला असून फरार हल्लेखोराचा कसून शोध घेण्यात येत आहे.
ठाण्यात गेल्याच आठवड्यात चितळसर पोलिस ठाण्याचे पोलिस उपनिरीक्षक किसन भोईर यांची एका मद्यपी सराईत गुन्हेगाराने दगडाने प्रहार करून हत्या केली होती. त्यापाठोपाठ आता एका राजकीय पदाधिकाऱ्याची अशा प्रकारे गोळ्या झाडून हत्या झाल्याने शहरातील ढासळलेल्या कायदा-सुव्यवस्थेवर पुन्हा एकदा गंभीर प्रश्नचिन्ह निर्माण झाले आहे.
