वैभव पवार /गणपतीपुळे: तालुका क्रीडा अधिकारी कार्यालयाच्या वतीने आयोजित तालुकास्तरीय शालेय मैदानी क्रीडा स्पर्धेत जिंदल विद्या मंदिर, रत्नागिरीच्या विद्यार्थ्यांनी उत्कृष्ट कामगिरी करत घवघवीत यश संपादन केले आहे. या स्पर्धेत शाळेच्या खेळाडूंनी विविध धावण्याच्या शर्यतींमध्ये पदकांची लयलूट केली असून, दोन खेळाडूंची थेट जिल्हास्तरीय स्पर्धेसाठी निवड झाली आहे.
रविवारी, ४ ऑक्टोबर रोजी पार पडलेल्या या चुरशीच्या स्पर्धेत जिंदल विद्या मंदिरच्या विद्यार्थ्यांनी विविध वयोगटांत सहभाग नोंदवला होता. यामध्ये १७ वर्षांखालील मुलींच्या गटात कु. मृगजा हळदणकर हिने २०० मीटर धावण्याच्या शर्यतीत चमकदार कामगिरी करत द्वितीय क्रमांक पटकावला. तर १०० मीटर धावण्याच्या शर्यतीत कु. अस्मी हळदणकर हिने कडवी झुंज देत तृतीय क्रमांक मिळवला.
तसेच १७ वर्षांखालील मुलांच्या गटात कु. श्रवण केदारी याने १०० मीटर धावणे स्पर्धेत वेगवान धाव नोंदवत द्वितीय क्रमांक संपादन केला.
या स्पर्धेतील उल्लेखनीय कामगिरीच्या जोरावर कु. मृगजा हळदणकर आणि कु. श्रवण केदारी या दोघांची आगामी जिल्हास्तरीय मैदानी क्रीडा स्पर्धेसाठी निवड झाली आहे. या दुहेरी यशामुळे शाळेच्या शिरपेचात आणखी एक मानाचा तुरा रोवला गेला आहे.
विद्यार्थ्यांच्या या यशाबद्दल शाळेच्या मुख्याध्यापिका सोनिया सेठी यांनी पदक विजेत्या तसेच सहभागी विद्यार्थ्यांचे विशेष कौतुक करून अभिनंदन केले. खेळाडूंना शाळेचे क्रीडा शिक्षक रणजित जाधव, मिथिला मोरे, आदित्य पवार आणि रोहित यांचे मोलाचे मार्गदर्शन लाभले. या यशाबद्दल शाळेतील शिक्षकवृंद, शिक्षकेतर कर्मचारी आणि क्रीडाप्रेमींनी यशस्वी खेळाडूंचे मनःपूर्वक अभिनंदन करत पुढील जिल्हास्तरीय फेरीसाठी शुभेच्छा दिल्या आहेत.
