जयगड (प्रतिनिधी) : गडनरळ चौकवाडी येथील रस्त्याच्या वळणावर बोलेरो वाहन पलटी होऊन झालेल्या अपघातात दोघे जखमी झाले. ही घटना 28 मे 2026 रोजी दुपारी 1.30 वाजण्याच्या सुमारास घडली असून, याप्रकरणी जयगड पोलिस ठाण्यात गुन्हा दाखल करण्यात आला आहे.
या प्रकरणी प्रदीप पुनाजी वाघाटे (वय 57, रा. आदर्श नगर, वाटद-खंडाळा, ता. जि. रत्नागिरी) यांनी फिर्याद दिली आहे. आरोपी लिलाधर आत्माराम खाडे (रा. जयगड, सडेवाडी, ता. जि. रत्नागिरी) याच्याविरोधात गुन्हा दाखल करण्यात आला आहे.
फिर्यादी प्रदीप वाघाटे हे आरोपीच्या ताब्यातील महिंद्रा बोलेरो क्रमांक एमएच-08-एन-9082 या वाहनातून प्रेमचंद दयानंद ओझा व साक्षीदार अनिल दधिच यांच्यासह गडनरळ ते जयगड असा प्रवास करत होते. गाडी रस्त्यावरील खड्डा चुकवत असताना रस्त्याची परिस्थिती लक्षात न आल्याने आरोपीचा वाहनावरील ताबा सुटला. त्यानंतर चालकाने स्टेअरिंग दुसऱ्या बाजूला वळविल्याने वाहन जागीच पलटी झाले.
या अपघातात फिर्यादी प्रदीप वाघाटे आणि प्रेमचंद दयानंद ओझा जखमी झाले. अपघातात वाहनाचेही नुकसान झाले आहे.
या प्रकरणी जयगड पोलिस ठाण्यात गुन्हा रजिस्टर क्रमांक 72/2026 नुसार भारतीय न्यायसंहिता अधिनियम 2023 मधील कलम 281 आणि 125(ब) अन्वये गुन्हा दाखल करण्यात आला आहे.
