रत्नागिरी : रत्नागिरी जिल्ह्यातील प्रमुख महामार्ग, बाजारपेठा आणि सर्व्हिस रस्त्यांवर निष्काळजीपणे वाहने उभी करून वाहतुकीस अडथळा निर्माण करणाऱ्या तसेच पादचाऱ्यांच्या सुरक्षिततेला धोका पोहोचवणाऱ्या वाहनचालकांविरोधात पोलिसांनी धडक मोहीम उघडली आहे. गुरुवार, २९ ऑक्टोबर २०२६ रोजी सावर्डे, राजापूर आणि संगमेश्वर पोलीस ठाण्यांच्या हद्दीत सार्वजनिक रस्त्यांवर बेशिस्तपणे वाहने उभी केल्याप्रकरणी तब्बल पाच चालकांविरुद्ध भारतीय न्यायसंहिता २०२३ चे कलम २८५ अन्वये गुन्हे नोंदवण्यात आले आहेत.
सावर्डे पोलीस ठाण्याच्या हद्दीत वहाळफाटा ते पालवण सर्व्हिस रोडवर अमृततुल्य हॉटेलसमोर मॅक्स गाडी (क्रमांक एम.एच. १३ एन ६५७१) उभी करून वाहतुकीस अडथळा केल्याप्रकरणी रवींद्र विलास सावंत (वय ३४, रा. तोंडली सडेवाडी, ता. चिपळूण) याच्याविरुद्ध पोलीस हेड कॉन्स्टेबल सतिश कदम यांच्या फिर्यादीवरून गुन्हा दाखल करण्यात आला. सावर्डे बाजारपेठेत गुडलक हॉटेलसमोरील महामार्गावर टेम्पो (क्रमांक एम.एच. १० सी.आर. ८९८०) अस्ताव्यस्त उभा केल्याप्रकरणी रवीराज राजन शेडगे (वय ३६, रा. दापोली) याच्याविरुद्ध सहाय्यक पोलीस उपनिरीक्षक स्वप्निल साळवी यांनी दुसरी कारवाई नोंदवली.
राजापूर शहरात जुनेद चिकन सेंटरसमोर मुख्य रस्त्यावर वर्दळीच्या ठिकाणी बजाज रिक्षा (क्रमांक एम.एच. ०८ ए.क्यू. ५१६१) उभी करून वाहतूक कोंडी केल्याप्रकरणी अरुण जानू गितये (वय ६०, रा. गीतयेवाडी, वडदहसोळ, ता. राजापूर) याच्यावर पोलीस शिपाई संग्राम नरुटे यांच्या फिर्यादीवरून गुन्हा दाखल झाला. राजापूर तालुक्यातील कोदवली येथे सचिन स्क्रॅप मर्चंटसमोरील सर्व्हिस रोडवर बोलेरो पिकअप (क्रमांक एम.एच. ०८ डब्ल्यू ३९५१) बेवारस उभी करून रहदारीस अडथळा निर्माण केल्याबद्दल भरत वसंत शिंदे (वय ३४, रा. कोदवली पेट्रोल पंपाजवळ, राजापूर) याच्याविरुद्ध पोलीस शिपाई संभाजी कदम यांनी कारवाई केली.
संगमेश्वर तालुक्यातील माखजन बाजारपेठेत प्राथमिक आरोग्य केंद्रानजीकच्या रस्त्यावर महिंद्रा मॅक्स गाडी (क्रमांक एम.एच. ०८ सी ५०७४) उभी करून धोका निर्माण केल्याप्रकरणी राम श्रीपत किंजळकर (वय ४७, रा. मधली साळवीवाडी, खेरशेत, ता. चिपळूण) याच्यावर पोलीस कॉन्स्टेबल वैभवकुमार चौगुले यांच्या फिर्यादीवरून संगमेश्वर पोलीस ठाण्यात गुन्हा दाखल करण्यात आला आहे. सार्वजनिक रस्त्यांवर बेकायदेशीर व निष्काळजीपणे वाहने उभी करून अपघातांना निमंत्रण देणाऱ्यांविरोधात यापुढेही अशीच कडक कायदेशीर कारवाई सुरू राहणार असल्याचा इशारा पोलीस प्रशासनाने दिला आहे.
