गणपतीपुळे/ वैभव पवार: प्रसिद्ध तीर्थक्षेत्र संस्थान श्रीदेव गणपतीपुळे येथील लंबोदर गणपती मंदिर परिसरात आयोजित पाच दिवसीय ‘सामवेद स्वाहाकार’ आणि पूर्णाहूती सोहळा समस्त ब्रह्मवृंद यांच्या उत्तम नियोजनात अत्यंत भक्तिमय वातावरणात पार पडला. बुधवार, २१ ऑक्टोबर ते रविवार, २५ ऑक्टोबर २०२६ या आश्विन शुद्ध एकादशी ते चतुर्दशी या कालावधीत संपन्न झालेल्या या धार्मिक अनुष्ठानाला संस्थान श्रीदेव गणपतीपुळे यांचे मोलाचे सहकार्य लाभले. हिंदू धर्मातील चार प्रमुख वेदांपैकी उपासना, मनाची शांती, संगीत आणि मंत्रगायनाशी निगडित असलेल्या सामवेदाच्या प्रचलित तीन शाखांपैकी राणायनीय संहिता शाखेचा स्वाहाकार येथे पूर्णत्वास नेण्यात आला. यापूर्वी ऋग्वेद आणि यजुर्वेद स्वाहाकार यशस्वीरीत्या संपन्न झाल्यानंतर आयोजित या ज्ञान, मंत्र आणि भक्तीच्या सोहळ्यात मुख्य आचार्य वेदमूर्ती तुकाराम मुळे गुरुजी (अहिल्यानगर) यांच्या मार्गदर्शनाखाली वे.मू. दत्तदास शेवडे गुरुजी (लांजा), वेदवित् मुळे, सचिन व्यास, जयप्रकाश शर्मा आणि अभिषेक शर्मा यांनी पौरोहित्य करत मंत्रजागर केला. या सोहळ्यात ब्रह्मवृंदांचे यजमान प्रतिनिधी म्हणून सौ. सुहिता आणि डॉ. चैतन्य वासंती वामन घनवटकर या दांपत्याने संकल्प पूर्ती केली. भारत देश, सनातन धर्म, भारतीय सैनिक आणि सर्व नागरिकांच्या कल्याणासाठी प्रार्थना करण्यात आली. लयबद्ध मंत्रघोष आणि स्वाहाकाराने अवघा मंदिर परिसर पावन झाला असून, मोठ्या संख्येने भाविकांनी या पर्वाचा लाभ घेतला; तसेच आगामी काळातही सर्वांच्या सहकार्याने असेच उपक्रम निरंतर होत राहोत, अशी कृतज्ञता आयोजक ब्रह्मवृंद, देवस्थान व भाविकांच्या वतीने व्यक्त करण्यात आली.
श्री क्षेत्र गणपतीपुळे येथे सामवेद स्वाहाकार सोहळा भक्तिभावात संपन्न; भाविकांच्या उपस्थितीत पूर्णाहूती
