चिपळूण : डिजिटल क्रांती आणि ‘डिजिटल इंडिया’च्या दिशेने वेगाने झेप घेत असताना चिपळूण तालुक्यातील तिवरे-गंगेचीवाडी परिसरातील ग्रामस्थांना मात्र आजही पुरेशा मोबाईल नेटवर्कसाठी वणवण करावी लागत असल्याचे विदारक चित्र समोर आले आहे. परिसरात मोबाईल नेटवर्कचा सिग्नल अत्यंत क्षीण अथवा अनेक ठिकाणी पूर्णपणे गायब असल्याने नागरिकांना दैनंदिन संवादापासून ते डिजिटल व्यवहारांपर्यंत अनेक अडचणींना सामोरे जावे लागत आहे. त्यामुळे या संपूर्ण परिसराचा तातडीने तांत्रिक सर्व्हे करून येथे ‘जिओ’ कंपनीचा नवीन मोबाईल टॉवर उभारण्यात यावा, अशी एकमुखी आणि आक्रमक मागणी ग्रामस्थांनी केली आहे.
तिवरे-गंगेचीवाडी परिसरात मोबाईलवरून एक साधा फोन लावण्यासाठीही नागरिकांना घराबाहेर पडून टेकड्यांवर किंवा उंचावरच्या जागेवर जावे लागत आहे. वारंवार कॉल कट होणे, आवाज न येणे यांमुळे संपर्काचा पुरता बोजवारा उडाला आहे. आजच्या काळात बँक व्यवहार, यूपीआय पेमेंट्स, शासकीय योजनांचे ऑनलाइन अर्ज, विद्यार्थ्यांचे ऑनलाइन शिक्षण आणि तरुणांच्या स्पर्धा परीक्षांची तयारी यांसारख्या अत्यावश्यक गोष्टी इंटरनेटवर अवलंबून असताना नेटवर्कअभावी येथील संपूर्ण जनजीवन ठप्प होत आहे. गावातील छोटे व्यावसायिक, दुकानदार आणि वर्क फ्रॉम होम करणाऱ्या तरुणांनाही या समस्येचा मोठा फटका बसत असून, माहितीच्या युगात हा परिसर मुख्य प्रवाहापासून तुटल्याची भावना निर्माण झाली आहे.
उंच-सखल आणि दुर्गम भौगोलिक रचनेमुळे, विशेषतः पावसाळ्यात येथील परिस्थिती अधिकच बिकट बनते. अतिवृष्टीच्या काळात रस्ते बंद झाल्यास किंवा दरड, पूर यांसारख्या आपत्तीच्या प्रसंगी नेटवर्क हीच एकमेव आधार ठरते. गावात एखादी व्यक्ती अचानक आजारी पडल्यास किंवा अपघात झाल्यास रुग्णवाहिका, डॉक्टर अथवा पोलिसांशी संपर्क साधताना नेटवर्कअभावी जिवावर बेतण्याची शक्यता निर्माण होते. त्यामुळे नेटवर्कची अनुपलब्धता ही केवळ तांत्रिक अडचण नसून नागरिकांच्या मूलभूत सुरक्षेचा आणि आरोग्याचा गंभीर प्रश्न बनला आहे.
या सर्व गंभीर समस्यांवर कायमस्वरूपी तोडगा काढण्यासाठी संबंधित दूरसंचार कंपनीने तातडीने भौगोलिक व तांत्रिक पाहणी करून तिवरे-गंगेचीवाडीमध्ये मोबाईल टॉवर उभारावा, अशी मागणी परिसरातील नागरिकांनी लावून धरली आहे. टॉवर उभारणीसाठी आवश्यक असलेली जागा तसेच प्रशासकीय व स्थानिक पातळीवर लागणारे सर्व सहकार्य करण्याची ग्रामस्थांची पूर्ण तयारी असून, संबंधित यंत्रणांनी या मागणीकडे तातडीने लक्ष देऊन टॉवरचे काम सुरू करावे, अन्यथा तीव्र आंदोलन छेडण्याचा इशारा ग्रामस्थांच्या वतीने देण्यात आला आहे.
