रत्नागिरी: रत्नागिरी जिल्हा परिषद प्राथमिक शिक्षण विभागातील शिक्षक आणि केंद्रप्रमुखांच्या ई-केवायसी प्रक्रियेत राजापूर तालुक्याने अत्यंत निराशाजनक कामगिरी नोंदवली असून, सप्टेंबरअखेरपर्यंत एकाही शिक्षक अथवा केंद्रप्रमुखाचा प्रस्ताव पुढे न पाठवल्याने तालुक्याची प्रगती थेट शून्य टक्क्यांवर अडखळली आहे. याउलट मंडणगड तालुक्याने तब्बल ९३.५८ टक्के काम पूर्ण करून जिल्ह्यात अव्वल स्थान पटकावले आहे. जिल्हा परिषदेच्या प्राथमिक शिक्षण विभागाने सर्व तालुकाप्रमुख आणि मुख्याध्यापकांना लेखी पत्र पाठवून ही मोहीम तातडीने पूर्ण करण्याचे कडक निर्देश दिले होते. तरीही संपूर्ण जिल्ह्यात कार्यरत असलेल्या ५ हजार ६३ प्राथमिक शिक्षक आणि २३७ केंद्रप्रमुख अशा एकूण ५ हजार ३०० कर्मचाऱ्यांपैकी संपूर्ण जिल्ह्याची सरासरी केवळ ६८.९८ टक्क्यांवरच थांबली आहे.
सद्यस्थितीतील अधिकृत अहवालानुसार, जिल्ह्यातील ४ हजार १६१ कर्मचाऱ्यांनी आपले प्रस्ताव सादर केले असून त्यातील ३ हजार ६५६ प्रस्तावांना प्रशासकीय मंजुरी मिळाली आहे, तर १७० प्रस्ताव त्रुटींमुळे बाद झाले असून ३३५ प्रस्ताव अजूनही तपासणीच्या पातळीवर प्रलंबित आहेत. सर्वात धक्कादायक बाब म्हणजे १ हजार १३९ कर्मचाऱ्यांनी अद्याप प्रक्रियेला सुरुवातच न केल्याने जिल्ह्यात एकूण १ हजार ६४४ शिक्षकांची ई-केवायसी लटकलेली आहे. यात राजापूरमधील ६३५ शिक्षक आणि ३२ केंद्रप्रमुख अशा ६६७ जणांपैकी एकानेही प्रस्ताव सादर न केल्याने ही गंभीर उदासीनता चव्हाट्यावर आली आहे. संगमेश्वर तालुक्यातीलही ३५ केंद्रप्रमुखांपैकी एकानेही स्वतःची नोंदणी पुढे न पाठवल्यामुळे जबाबदार अधिकाऱ्यांनीच नियमांकडे पाठ फिरवल्यास शिक्षकांकडून काय अपेक्षा ठेवायची, असा संतप्त सवाल आता उपस्थित केला जात आहे. ई-केवायसी अपूर्ण राहिल्यास संबंधितांचे ऑक्टोबर व नोव्हेंबर महिन्याचे वेतन रोखले जाणार असल्याचे संकेत असल्याने, आता शासन या मोहिमेला मुदतवाढ देऊन दिलासा देणार की वेतनावर थेट कारवाईचा बडगा उगारणार, याकडे शैक्षणिक वर्तुळाचे लक्ष लागले आहे.
