खेड : भारतीय जनता पार्टी युवा मोर्चाच्या महाराष्ट्र प्रदेश कार्यकारिणीची नुकतीच अधिकृत घोषणा करण्यात आली असून, यामध्ये रत्नागिरी जिल्ह्यातील खेड तालुक्याचे भूमिपुत्र अ‍ॅड. मिलिंद उर्फ दादू नांदगावकर यांची प्रदेश सचिवपदी नियुक्ती करण्यात आली आहे. कोकणातील एका धडाडीच्या आणि तरुण चेहऱ्याला प्रदेश पातळीवर मिळालेल्या या महत्त्वाच्या संधीमुळे संपूर्ण रत्नागिरी जिल्ह्यासह कोकणातील भाजप कार्यकर्त्यांमध्ये उत्साहाचे वातावरण निर्माण झाले आहे.
भाजपचे महाराष्ट्र प्रदेशाध्यक्ष रवींद्र चव्हाण यांच्या मार्गदर्शनाखाली तसेच प्रदेश सरचिटणीस व युवा मोर्चा प्रभारी सुनील राणे आणि युवा मोर्चाचे प्रदेशाध्यक्ष कृष्णराज महाडिक यांच्या मान्यतेने ही नवीन पदाधिकारी यादी जाहीर करण्यात आली आहे. अ‍ॅड. दादू नांदगावकर यांनी आजवर स्थानिक पातळीवर केलेले संघटनात्मक कार्य, त्यांचा सामाजिक क्षेत्रातील सहभाग आणि युवकांमधील दांडगा जनसंपर्क लक्षात घेऊन पक्षाने त्यांच्यावर ही जबाबदारी सोपवली आहे. या निवडीबद्दल बोलताना पक्षाच्या वरिष्ठ नेतृत्वाने विश्वास व्यक्त केला आहे की, या नव्या नियुक्त्यांमुळे आगामी काळात राज्यातील युवा संघटना अधिक भक्कम आणि कार्यक्षम बनेल तसेच तळागाळातील तरुणांपर्यंत पक्षाची ध्येयधोरणे पोहोचण्यास गती मिळेल. आपल्या निवडीनंतर अ‍ॅड. मिलिंद नांदगावकर यांनी प्रदेश नेतृत्वाचे आभार मानले असून, पक्षसंघटना मजबूत करण्यासाठी आणि युवकांच्या न्याय्य हक्कांसाठी राज्यभरात अधिक जोमाने कार्य करणार असल्याचा निर्धार त्यांनी व्यक्त केला आहे. या निवडीबद्दल राजकीय, सामाजिक व व्यावसायिक क्षेत्रांतून त्यांच्यावर अभिनंदनाचा वर्षाव होत आहे.
