ओमानच्या किनाऱ्याजवळ व्यावसायिक जहाजावर हल्ला; ११ भारतीय जखमी, भारताकडून निषेध

दिल्ली: इराणमधील वाढत्या तणावाच्या पार्श्वभूमीवर ओमानच्या किनाऱ्याजवळ एका व्यावसायिक जहाजावर हल्ला करण्यात आला. या हल्ल्यात ११ भारतीय नागरिक जखमी झाले आहेत.मंगळवारी (६ ऑक्टोबर) भारतीय परराष्ट्र मंत्रालयाने या हल्ल्याचा निषेध केला.जखमी भारतीय नागरिकांवर ओमानमधील खासाब येथे उपचार सुरू आहेत.

परराष्ट्र मंत्रालयाने म्हटले, “ओमानच्या किनाऱ्याजवळ पनामाचा ध्वज असलेल्या ‘एमटी ऑन पीस’ या व्यावसायिक जहाजावर झालेल्या हल्ल्याचा आम्ही निषेध करतो. हे जहाज स्ट्रेट ऑफ होर्मुझमधून जात असताना एका प्रक्षेपकाच्या (हल्ल्यासाठी वापरल्या जाणाऱ्या वस्तूच्या) तडाख्याला बळी पडले.”

मंत्रालयाने पुढे सांगितले की, जहाजावरील एकूण १९ क्रू सदस्यांपैकी १७ जण भारतीय नागरिक आहेत. या हल्ल्यात १२ क्रू सदस्य जखमी झाले असून त्यापैकी ११ भारतीय नागरिक आहेत. ओमानच्या अधिकाऱ्यांच्या मदतीने जखमी क्रू सदस्यांना जहाजातून सुरक्षित बाहेर काढण्यात आले असून त्यांच्यावर ओमानमधील खासाब येथे उपचार सुरू आहेत. त्यांच्या मदतीसाठी ओमानच्या अधिकाऱ्यांचे आम्ही आभार मानतो.


परराष्ट्र मंत्रालयाने म्हटले की, या भागात जहाजांवर सातत्याने होत असलेले हल्ले भारतासाठी गंभीर चिंतेचा विषय आहेत. या भागातील शांतता आणि स्थैर्य कायम राखण्यासाठी असे हल्ले तातडीने थांबवण्याची आमची मागणी आम्ही पुन्हा एकदा अधोरेखित करतो.मंत्रालयाने पुढे सांगितले की, या भागातील व्यावसायिक जहाजे, नाविक आणि नागरिकांशी संबंधित पायाभूत सुविधांना लक्ष्य करणे थांबवले पाहिजे. आंतरराष्ट्रीय जलमार्गांवरून जहाजांची वाहतूक आणि व्यापाराची प्रक्रिया शक्य तितक्या लवकर पूर्ववत केली पाहिजे.

दरम्यान, इराण, अमेरिका आणि इस्रायल यांच्यात युद्ध सुरू झाल्यापासून स्ट्रेट ऑफ होर्मुझमध्ये संकटाची परिस्थिती निर्माण झाली आहे. अमेरिकेचा दावा आहे की, होर्मुझवर त्यांचे पूर्ण नियंत्रण आहे. तर इराणचा दावा आहे की, होर्मुझवर त्यांचा अधिकार असून त्याचे नियमनही इराणच करत आहे.