रत्नागिरी: राज्य शासनाच्या महत्त्वाकांक्षी ‘पुण्यश्लोक अहिल्यादेवी होळकर शेतकरी कर्जमुक्ती योजना २०२६’ अंतर्गत पात्र लाभार्थ्यांची ३.५१ लाख शेतकऱ्यांचा समावेश असलेली बहुप्रतिक्षित तिसरी यादी नुकतीच जाहीर करण्यात आली आहे. या यादीतील शेतकऱ्यांनी प्रमाणीकरणाची प्रक्रिया विनाविलंब पूर्ण केल्यास कर्जमुक्तीची रक्कम थेट त्यांच्या बँक खात्यावर वर्ग केली जाणार असून, सर्व पात्र शेतकऱ्यांनी जवळच्या केंद्रांवर जाऊन ही प्रक्रिया तात्काळ पूर्ण करावी, असे आवाहन जिल्हा उपनिबंधक राम कुलकर्णी यांनी केले आहे. या योजनेनुसार १ एप्रिल २०१९ ते ३१ मार्च २०२५ या कालावधीत घेतलेल्या, ३० सप्टेंबर २०२५ पर्यंत थकीत राहिलेल्या आणि ३१ मार्च २०२६ पर्यंत परतफेड न झालेल्या पीक व पुनर्गठित कर्जास २ लाख रुपयांपर्यंत संपूर्ण कर्जमाफी दिली जात आहे.
विविध बँकांनी महाआयटी पोर्टलवर नोंदवलेल्या एकूण ३१.१७ लाख थकीत कर्जखात्यांची संगणकीय तपासणी केल्यानंतर टप्प्याटप्प्याने याद्या प्रसिद्ध करण्यात येत आहेत. यापूर्वी २४ जुलै २०२६ रोजी पहिल्या टप्प्यात १६.९६ लाख आणि ११ सप्टेंबर रोजी दुसऱ्या टप्प्यात ४.२० लाख शेतकऱ्यांची नावे जाहीर करण्यात आली होती. त्यानंतर १२ ऑक्टोबर रोजी प्रसिद्ध झालेल्या ३.५१ लाख शेतकऱ्यांच्या तिसऱ्या यादीसह आतापर्यंत राज्यातील एकूण २४.६७ लाख शेतकरी या कर्जमुक्तीसाठी पात्र ठरले आहेत.
ही योजना संपूर्ण कर्जमुक्तीची असून ३१ मार्च २०२६ नंतर आकारण्यात आलेले सर्व व्याज व अतिरिक्त खर्च पूर्णपणे माफ करण्यात आले आहेत. शेतकऱ्यांनी आपल्या संबंधित बँक शाखा, विविध कार्यकारी सेवा सहकारी संस्था अथवा ग्रामपंचायतींमध्ये लावण्यात आलेल्या यादीतून ३१ मार्च २०२६ अखेरच्या थकबाकीची खातरजमा करून घ्यावी आणि नजीकच्या ‘आपले सरकार सेवा केंद्रा’वर जाऊन आपली ओळख पडताळणी पूर्ण करावी. राष्ट्रीयकृत व व्यापारी बँकांमधील ज्या शेतकऱ्यांची थकबाकी दोन लाखांपेक्षा अधिक आहे, त्यांची खाती शासनाच्या विशेष ‘हेअर कट’ धोरणानुसार निरंक केली जाणार आहेत. याशिवाय मयत शेतकरी, वयोवृद्ध नागरिक अथवा बायोमेट्रिक अडचणी असलेल्या व्यक्तींसाठी १९ ऑगस्ट २०२६ च्या शासन निर्णयानुसार लागू केलेल्या विशेष कार्यप्रणालीद्वारे दिलासा देण्यात आला असल्याचे प्रशासनाने स्पष्ट केले आहे.
