रत्नागिरीच्या शासकीय वैद्यकीय महाविद्यालयात २५ वे देहदान
रत्नागिरी : मरणोत्तर देहाचा उपयोग वैद्यकीय शिक्षणातील भावी डॉक्टरांच्या अभ्यासासाठी आणि संशोधनासाठी व्हावा, या उदात्त भावनेतून येथील आगाशे कुटुंबीयांनी पुरोगामी पाऊल उचलत मरणोत्तर देहदान केले आहे. या संवेदनशील निर्णयामुळे रत्नागिरीच्या शासकीय वैद्यकीय महाविद्यालयात २५ वे देहदान यशस्वीरीत्या नोंदवले गेले.
स्थानिक हेड पोस्ट ऑफिस परिसरातील आगाशेवाडा येथील रहिवासी विजया नारायण आगाशे (वय ९१) यांचे मंगळवारी वृद्धापकाळाने निधन झाले. सामाजिक बांधिलकी आणि वैज्ञानिक जाणीव जपणाऱ्या विजया आगाशे यांनी हयातीतच १७ जून २०२६ रोजी शासकीय वैद्यकीय महाविद्यालयाकडे मरणोत्तर देहदानाचे इच्छापत्र अधिकृतपणे सादर केले होते. त्यांच्या निधनानंतर त्यांच्या या अंतिम इच्छेचा आणि संकल्पाचा आदर राखत त्यांचे सुपुत्र मुकुंद आगाशे, विवेक आगाशे, नातू हर्षद आगाशे, नितीन महाबळ तसेच ऐश्वर्या आगाशे यांनी तात्काळ पुढाकार घेतला. दुःखाच्या प्रसंगातही वैज्ञानिक दृष्टिकोनाला प्राधान्य देत कुटुंबीयांनी त्यांचा पार्थिव देह शासकीय वैद्यकीय महाविद्यालयाकडे सुपूर्द केला.
शासकीय वैद्यकीय महाविद्यालयाचे अधिष्ठाता डॉ. जयप्रकाश रामानंद यांच्या मार्गदर्शनाखाली हे देहदान स्वीकारण्याची प्रक्रिया पूर्ण करण्यात आली. या संपूर्ण प्रक्रियेसाठी शरीररचनाशास्त्र विभागप्रमुख डॉ. सादिकअली सय्यद, डॉ. योगिता कांबळे, समाजसेवा अधीक्षक रेशम जाधव यांच्यासह पूर्वा तोडणकर, भूमी पारकर, प्रियल आडीवरेकर, मिथिलेश मुरकर, मिहीर लोंढे, श्रेयश जोशी, राज पेडणेकर आणि वाहनचालक प्रीतम भोसले, प्रथमेश पवार, नितीन घोसाळकर यांनी परिश्रम घेतले. शासकीय वैद्यकीय महाविद्यालयाच्या इतिहासातील हे २५ वे देहदान ठरले असून, आगाशे कुटुंबीयांनी दाखवलेल्या या आदर्श व पुरोगामी निर्णयाबद्दल महाविद्यालय प्रशासनाच्या वतीने त्यांच्याप्रति मनःपूर्वक कृतज्ञता व्यक्त करण्यात आली आहे.
