राजापूर/ तुषार पाचलकर: ग्रामीण भागातील गरजू रुग्णांना दर्जेदार आरोग्य सेवा मिळावी या उद्देशाने राजापूर येथील ग्रामीण रुग्णालयात बुधवार, ७ ऑक्टोबर रोजी विशेष मोफत जनरल शस्त्रक्रिया शिबिर अत्यंत उत्साहात संपन्न झाले. या शिबिरात रत्नागिरीचे जिल्हा शल्यचिकित्सक डॉ. भास्कर जगताप तसेच डॉ. ज्ञानेश विटेकर यांनी स्वतः सर्जन म्हणून उपस्थित राहून रुग्णांवर यशस्वी शस्त्रक्रिया केल्या, तर भूलतज्ज्ञ म्हणून डॉ. दत्तप्रसाद केतकर यांनी महत्त्वाची जबाबदारी सांभाळली. या शिबिरादरम्यान एकूण तीन रुग्णांवर क्लिष्ट जनरल शस्त्रक्रिया यशस्वीरीत्या पार पाडण्यात आल्या.
हे शिबिर यशस्वी करण्यासाठी ग्रामीण रुग्णालय राजापूरचे वैद्यकीय अधीक्षक डॉ. राम मेस्त्री, वैद्यकीय अधिकारी डॉ. आर्यन बहादुरे, डॉ. हर्षानी भुजाडे, डॉ. प्रसन्न यांच्यासह परिचारिका बोरकर, लांजेकर, वाघाटे, नाटेकर, राठोड, महाडिक तसेच कर्मचारी पवार, ताटे, जाधव, नाखरेकर यांनी विशेष परिश्रम घेतले. महात्मा ज्योतिराव फुले जन आरोग्य योजनेअंतर्गत आयोजित करण्यात आलेले हे जनरल शस्त्रक्रिया शिबिर इथून पुढे नियमितपणे दर महिन्याला राजापूर ग्रामीण रुग्णालयात राबवण्यात येणार असल्याची माहिती वैद्यकीय अधीक्षक डॉ. राम मेस्त्री यांनी दिली असून, राजापूर व लांजा तालुक्यातील जास्तीत जास्त गरजू रुग्णांनी या आरोग्य सुविधेचा लाभ घ्यावा, असे जाहीर आवाहनही त्यांनी केले आहे.
