लांजा : लांजा तालुक्यातील गोळवशी गावातील खांबडवाडी मित्र मंडळाच्या वतीने यंदा शारदीय नवरात्रोत्सवाचे २९ वे वर्ष साजरे करण्यात येणार आहे. रविवार, ११ ऑक्टोबर ते मंगळवार, २० ऑक्टोबर २०२६ या कालावधीत हा उत्सव धार्मिक उत्साहात आणि विविध सामाजिक-सांस्कृतिक कार्यक्रमांच्या माध्यमातून पार पडणार आहे. गेल्या २८ वर्षांपासून ग्रामस्थ, परिसरातील भाविक आणि मुंबईस्थित गावकऱ्यांच्या सहकार्याने सुरू असलेली ही उत्सवाची परंपरा यंदाही कायम राखण्यात येणार आहे.
नवरात्रोत्सवानिमित्त देवीचे आगमन, दैनंदिन पूजा-अर्चा, आरती आणि भजन यांसह विविध कार्यक्रमांचे आयोजन करण्यात आले आहे. शालेय विद्यार्थ्यांच्या कलागुणांना वाव देणारे सांस्कृतिक कार्यक्रम, विद्यार्थी गुणगौरव सोहळा, मनोरंजक खेळ, समाजप्रबोधनपर उपक्रम, भजनाचे डबलबारी सामने, वेशभूषा स्पर्धा, महिलांसाठी विशेष कार्यक्रम तसेच रास-गरबा अशा विविध उपक्रमांमुळे उत्सवात भक्तीबरोबरच सांस्कृतिक रंगत अनुभवायला मिळणार आहे.
या उत्सवाचे वैशिष्ट्य म्हणजे धार्मिक कार्यक्रमांसोबत सामाजिक बांधिलकी आणि ग्रामस्थांमधील एकोपा जपण्यावर मंडळाकडून दिला जाणारा भर. मंडळाचे हितचिंतक, गोळवशीतील ग्रामस्थ आणि मुंबईस्थित गावकऱ्यांच्या सहकार्याने उत्सवाच्या दहा दिवसांत दररोज महाप्रसादाची व्यवस्था करण्यात आली आहे. त्यामुळे देवीच्या दर्शनासाठी येणाऱ्या भाविकांना धार्मिक कार्यक्रमांसोबत महाप्रसादाचाही लाभ घेता येणार आहे.
गेल्या अनेक वर्षांपासून सातत्याने आयोजित करण्यात येणाऱ्या या नवरात्रोत्सवाला गाव, तालुका आणि जिल्हा पातळीवरील विविध क्षेत्रांतील मान्यवर भेट देत असतात. मंडळाच्या सामाजिक व सांस्कृतिक उपक्रमांचे तसेच उत्सवाच्या माध्यमातून जपल्या जाणाऱ्या सामाजिक एकतेचे वेळोवेळी कौतुक केले जाते. धार्मिक श्रद्धा, सांस्कृतिक परंपरा आणि ग्रामस्थांचे एकत्रित प्रयत्न यांच्या बळावर खांबडवाडी मित्र मंडळाचा हा नवरात्रोत्सव गोळवशी गावाच्या लौकिकात भर घालणारा ठरला आहे.
यंदाच्या २९ व्या नवरात्रोत्सवात गोळवशीसह लांजा तालुक्यातील आणि परिसरातील भाविकांनी मोठ्या संख्येने उपस्थित राहून देवीचे दर्शन घ्यावे आणि विविध धार्मिक व सांस्कृतिक कार्यक्रमांचा लाभ घ्यावा, असे आवाहन खांबडवाडी मित्र मंडळ, गोळवशी यांच्या वतीने करण्यात आले आहे.
