शालेय स्नेहसंमेलनापासून सुरू झालेला प्रवास पोहोचला मल्टिप्लेक्सपर्यंत; कोकणातील ग्रामीण कलाकाराची चित्रपटसृष्टीत दमदार झेप
लांजा/अरबाज नेवरेकर: महाराष्ट्रातील मल्टिप्लेक्स चित्रपटगृहांमध्ये गेल्या तीन आठवड्यांपासून तुफान गर्दी खेचणाऱ्या आणि प्रेक्षकांची दाद मिळवणाऱ्या ‘जयंती २’ या मराठी चित्रपटात लांजा तालुक्यातील कुर्णे गावचा तरुण अभिनेता आर्यन अनिल कासारे याने साकारलेली भूमिका सध्या विशेष कौतुकाचा विषय ठरत आहे. ग्रामीण भागातील मातीशी नाळ जोडून अभिनयाचे बाळकडू घेतलेल्या आर्यनने या चित्रपटात अत्यंत लक्षवेधी काम करून रूपेरी पडद्यावर स्वतःची स्वतंत्र नाममुद्रा उमटवली आहे.
अभिनेता बनण्याची जिद्द बालपणापासूनच उराशी बाळगणाऱ्या आर्यनच्या अभिनय प्रवासाची सुरुवात वयाच्या अवघ्या सहाव्या वर्षी शालेय स्नेहसंमेलनाच्या मंचावरून झाली. शिक्षक राजेश गोसावी यांच्या मार्गदर्शनाखाली अभिनयाचे प्राथमिक धडे गिरवल्यानंतर त्याने संस्कृती फाऊंडेशनच्या माध्यमातून बालकलाकार म्हणून रंगभूमी गाजवली. संस्कृती फाऊंडेशनच्या ‘बनी तो बनी’ या बहुचर्चित एकांकिकेने राज्यस्तरीय स्पर्धा गाजवत अनेक पारितोषिके पटकावली, ज्यात आर्यनच्या सहज आणि प्रगल्भ अभिनयाची राज्यभरात वाहवा झाली.
रंगभूमीवरील अनुभवाच्या बळावर आर्यनने ‘माझा एल्गार’ या चित्रपटातून मोठ्या पडद्यावर पदार्पण केले. त्यानंतर ‘सिनेमास्कोप’ या चित्रपटात संजय कापरे, विना जामकर आणि मिलिंद पटवर्धन यांसारख्या दिग्गज कलाकारांसोबत काम करण्याची मोठी संधी त्याला मिळाली. आधीच्या चित्रपटांमध्ये केलेल्या दर्जेदार कामामुळे आर्यनचा अभिनय अधिक धारदार होत गेला. अभिनयाची आवड जोपासताना त्याने शिक्षणाकडे कधीही दुर्लक्ष केले नाही. कुर्णे येथील प्राथमिक शाळा आणि लांजाच्या न्यू इंग्लिश स्कूलमध्ये शालेय शिक्षण पूर्ण केल्यानंतर त्याने गोवा येथील नामांकित कला अकादमीतून पदवीचे शिक्षण पूर्ण केले. या काळात व्यावसायिक व स्पर्धात्मक नाटकांतून त्याचा वावर कायम राहिला.
नाट्य क्षेत्रातील उच्च शिक्षणासाठी त्याने सावित्रीबाई फुले पुणे विद्यापीठाच्या ललित कला केंद्रात प्रवेश घेतला. याच दरम्यान त्याने ‘जयंती २’ चित्रपटासाठी ऑडिशन दिली आणि आपल्या कौशल्याच्या जोरावर या बहुचर्चित चित्रपटात महत्त्वाची भूमिका मिळवली. सध्या महाराष्ट्रातील मल्टिप्लेक्समध्ये ‘जयंती २’ चित्रपटाला मिळणाऱ्या उदंड प्रतिसादात आर्यनच्या कामाची समीक्षक आणि प्रेक्षकांकडून मुक्तकंठाने प्रशंसा केली जात आहे. कोकणातील ग्रामीण भागातून सुरू झालेला हा अभिनय प्रवास आज यशाच्या शिखरावर पोहोचल्याने संपूर्ण लांजा तालुक्यातून आर्यन कासारेवर अभिनंदनाचा वर्षाव होत आहे.
