लांजा: मुंबई-गोवा राष्ट्रीय महामार्गावर आंजणारी पुलाजवळ घडलेल्या भीषण अपघातप्रकरणी कंटेनर ट्रकच्या चालकाविरुद्ध लांजा पोलीस ठाण्यात निष्काळजीपणे व भरधाव वेगाने वाहन चालवून मृत्यूस कारणीभूत ठरल्याचा गुन्हा दाखल करण्यात आला आहे. कर्तव्यावर असलेल्या पोलिसांच्या शासकीय वाहनाला मागून जोरदार धडक देऊन नदीपात्रात कोसळलेल्या या भीषण अपघातात हातखंबा वाहतूक मदत केंद्राचे सहाय्यक पोलीस उपनिरीक्षक संतोष आप्पासाहेब गायकवाड यांच्यासह ट्रकचालक व क्लिनर अशा तिघांचा जागीच मृत्यू झाला होता.
याप्रकरणी अपघातात गंभीर जखमी झालेले वाहतूक पोलीस कॉन्स्टेबल अनिल अशोक शिंगाडे (वय ३६, रा. रत्नागिरी शहर पोलीस वसाहत) यांनी लांजा पोलिसांत अधिकृत फिर्याद दिली आहे. ३१ ऑक्टोबरच्या मध्यरात्री आंजणारी पुलाखाली नदीपात्रात गाडी कोसळल्याची माहिती मिळाल्यानंतर पोलीस कॉन्स्टेबल शिंगाडे आणि सहाय्यक पोलीस उपनिरीक्षक गायकवाड हे शासकीय वाहनातून (क्रमांक MH 08 BE 3561) मदतकार्यासाठी पोहोचले होते. त्यावेळी गोव्याच्या दिशेने जाणाऱ्या ट्रकने (क्रमांक RJ 09 GE 2397) रस्त्याच्या परिस्थितीकडे दुर्लक्ष करत पोलिसांच्या उभ्या वाहनाला जोरदार धडक दिली. या धडकेनंतर दोन्ही वाहने पुलावरून थेट नदीपात्रात कोसळली होती.
या भीषण दुर्घटनेत शासकीय वाहनाचा पूर्ण चक्काचूर होऊन पोलीस उपनिरीक्षक संतोष गायकवाड, ट्रकचालक मदन हेम सिंह (वय ४१, रा. राजस्थान) आणि क्लिनर दिनेश महेंद्र सिंह (वय १५, रा. राजस्थान) यांचा मृत्यू झाला. तर पोलीस कॉन्स्टेबल अनिल शिंगाडे गंभीर जखमी झाले. या घटनेनंतर लांजा पोलिसांनी मृत ट्रकचालक मदन सिंह याच्याविरुद्ध भारतीय न्याय संहिता (BNS) २०२३ चे कलम १०६(१), २८१, १२५(अ), १२५(ब) तसेच मोटार वाहन कायदा कलम १८४ अन्वये गुन्हा रजिस्टर क्रमांक २८३/२०२६ नुसार दाखल केला असून पोलीस या प्रकरणाचा पुढील तपास करत आहेत.
