संगमेश्वर (दिनेश आंब्रे) : महाराष्ट्र महिला शेतकरी सबलीकरण अधिनियम २०२६ च्या पार्श्वभूमीवर महिलांना शेतकरी म्हणून हक्काची ओळख मिळवून देण्यासाठी आणि त्यांना शासकीय योजनांचे लाभ सहजतेने उपलब्ध व्हावेत या हेतूने आंबेड बुद्रुक येथे विशेष मोफत शिबिराचे आयोजन करण्यात आले होते. अंतरा फाउंडेशन, रत्नागिरी आणि कृषी विभाग, देवरुख यांच्या संयुक्त विद्यमाने पार पडलेल्या या उपक्रमाचा परिसरातील महिलांनी मोठ्या संख्येने लाभ घेतला. महिलांचे आर्थिक व सामाजिक सबलीकरण घडवून आणणे हा या मोहिमेचा मूळ उद्देश असून, या प्रमाणपत्राच्या माध्यमातून कृषी क्षेत्रातील महिलांना नवसंजीवनी मिळणार असल्याचे यावेळी अधोरेखित करण्यात आले.
या शिबिरात कृषी विभाग देवरुखचे मंडळ अधिकारी प्रभाकर कांबळे यांनी उपस्थित महिलांना मार्गदर्शन करताना शेतकरी प्रमाणपत्रासाठी अर्ज सादर करताना घ्यावयाची खबरदारी, आवश्यक कागदपत्रे तसेच अर्ज मंजूर झाल्यानंतर शासनाकडून प्राप्त होणाऱ्या विविध सेवा व लाभांविषयी सविस्तर तांत्रिक माहिती दिली. अंतरा फाउंडेशनच्या अध्यक्षा सौ. नुपुरा मुळ्ये यांनी महिला शेतकऱ्यांच्या हक्कांवर प्रकाश टाकत कृषीपूरक उद्योग व व्यवसाय करणाऱ्या कोणत्या महिला या योजनेसाठी पात्र ठरू शकतात, याविषयी सखोल मार्गदर्शन केले.
शिबिर यशस्वी करण्यासाठी अंतरा फाउंडेशनच्या उपाध्यक्षा सौ. सरिता आंबेकर, सौ. अपर्णा शिगवण आणि सौ. मधुरा मुळ्ये यांनी मोलाचे सहकार्य केले. याप्रसंगी गावातील प्रतिष्ठित नागरिक प्रभाकर गुरव, प्रकाश गुरव, संजय शिगवण, सलाउद्दीन बोट यांच्यासह स्थानिक ग्रामस्थ व लाभार्थी महिला मोठ्या संख्येने उपस्थित होत्या. महिलांना कृषी क्षेत्रात स्वतंत्र स्थान व अधिकार मिळवून देणारा हा उपक्रम ग्रामीण भागातील महिलांसाठी दिशादर्शक ठरला आहे.
