साखरपा: रत्नागिरी-कोल्हापूर महामार्गावरील अत्यंत महत्त्वाचा मानला जाणारा आंबा घाट घटस्थापनेच्या शुभमुहूर्तावर अखेर जड वाहनांच्या वाहतुकीसाठी खुला करण्यात आला आहे. पावसाळ्यातील अतिवृष्टीच्या तडाख्यामुळे घाटातील रस्ता खचून एक बाजू कोसळल्याने खबरदारीचा उपाय म्हणून प्रशासनाने गेले अनेक महिने येथील अवजड वाहतूक पूर्णपणे बंद ठेवली होती. याचा मोठा फटका स्थानिक व्यापारी वर्गाला बसत असल्याने जनजीवन आणि व्यापार विस्कळीत झाले होते. साखरपा येथे आयोजित नागरिकांच्या समस्या निवारण सभेत स्थानिक आमदार किरण सामंत यांनी या गंभीर समस्येची दखल घेत सार्वजनिक बांधकाम विभागाला धारेवर धरले होते. पाऊस थांबून उन्हाची चाहूल लागल्यामुळे आता घाट कोसळण्याचा धोका टळला आहे, त्यामुळे घटस्थापनेच्या मुहूर्तावर आंबा घाटातील अवजड वाहतूक तातडीने पूर्ववत सुरू करा, अन्यथा स्वतः मैदानात उतरून रस्ता खुला करावा लागेल, असा निर्वाणीचा इशारा आमदार सामंत यांनी भरसभेत दिला होता.
आमदारांच्या या आक्रमक पवित्र्यानंतर प्रशासकीय यंत्रणा तातडीने कामाला लागली आणि घटस्थापनेच्या दिवशीच आंबा घाटातून अवजड वाहनांची वाहतूक औपचारिकरीत्या सुरू करण्यात आली. आमदार किरण उर्फ भैय्या सामंत यांचा “शब्द म्हणजे वचन” याचा नवा प्रत्यय या निमित्ताने रत्नागिरीकरांना आला असून, प्रदीर्घ काळानंतर मार्ग मोकळा झाल्याने व्यापारी वर्गासह संपूर्ण जिल्ह्यातील जनतेने सुटकेचा निःश्वास सोडला आहे. ऐन सणासुदीच्या तोंडावर वाहतूक सुरळीत झाल्यामुळे परिसरातील नागरिकांमधून आमदार किरण सामंत यांचे आभार मानले जात आहेत.
