गुहागर: गुहागर पंचायत समिती अंतर्गत राबवण्यात आलेल्या विविध शासकीय विकासकामांमध्ये मोठ्या प्रमाणावर आर्थिक व प्रशासकीय अनियमितता झाल्याचा गंभीर आरोप करत शिवस्वराज्य शेतकरी संघाने थेट प्रशासनाविरोधात दंड धोपटले आहेत. नळपाणी योजना, ग्रामपंचायत इमारती, सार्वजनिक शौचालये आणि शेतकरी योजनांच्या निधी वापरातील कथित गैरव्यवहारांची सखोल व निष्पक्ष चौकशी करून दोषींवर कठोर कायदेशीर कारवाई करण्यात यावी, या मागणीसाठी शेतकरी संघाचे संस्थापक अध्यक्ष आनंद गोविंद भोजने यांनी गुहागर तहसीलदारांना निवेदन सादर केले असून, मागण्या मान्य न झाल्यास १३ ऑक्टोबरपासून आमरण उपोषण पुकारण्याचा निर्वाणीचा इशारा दिला आहे.
मासू खुर्द परिसरातील नळपाणी पुरवठा योजना गेल्या अनेक दिवसांपासून ठप्प असल्याने स्थानिक नागरिकांना तीव्र पाणीटंचाईचा सामना करावा लागत आहे. याशिवाय ग्रामपंचायतीच्या जुन्या व नवीन इमारतींचे बांधकाम, जनसुविधा योजनेतून खर्ची पडलेला अंदाजे दोन लाख रुपयांचा निधी, शौचालय उभारणीवर खर्च झालेले सुमारे तीन लाख रुपये, तसेच विहिरी, साठवण टाक्या आणि जलवाहिन्यांच्या कामांवर झालेल्या खर्चाच्या विश्वासार्हतेवर निवेदनातून थेट बोट ठेवण्यात आले आहे. प्रत्यक्ष जमिनीवर कामे अपूर्ण असतानाही कागदोपत्री ती पूर्ण दाखवून शासकीय तिजोरीतून निधी उचलल्याचा संशय व्यक्त करण्यात आला आहे.
या संपूर्ण प्रकरणाची सत्यता समोर आणण्यासाठी संबंधित कामांची प्रत्यक्ष जागेवर जाऊन पाहणी करावी, तसेच मंजूर अंदाजपत्रके, मोजमाप पुस्तिका (एमबी रेकॉर्ड), ठेकेदारांची बिले आणि देयकांची कसून छाननी करावी, अशी ठाम मागणी करण्यात आली आहे. याव्यतिरिक्त प्रधानमंत्री कृषी सिंचन योजनेअंतर्गत बांधण्यात आलेल्या बंधाऱ्यांचा प्रत्यक्ष दर्जा आणि शेती अवजारांच्या खरेदी व्यवहारांचीही तांत्रिक व आर्थिक तपासणी करण्याची मागणी निवेदनात समाविष्ट आहे. शासकीय निधीचा अपहार करणाऱ्या घटकांवर तात्काळ गुन्हे दाखल करून कारवाई करावी, अशी भूमिका शेतकरी संघाने घेतल्याने आता या संवेदनशील प्रकरणावर गुहागर तालुका प्रशासन काय भूमिका घेते, याकडे संपूर्ण तालुक्याचे लक्ष वेधले गेले आहे.
