सावर्डे : भावी पिढ्यांसाठी निसर्गाचा समतोल राखण्यासह भविष्यातील पर्यावरणीय संकटांना समर्थपणे तोंड देण्यासाठी समाजमनात जनजागृती निर्माण व्हावी, या व्यापक हेतूने सह्याद्री शिक्षण संस्थेच्या सामाजिक बांधिलकीतून मुंबई-गोवा महामार्गाचे हरित सुशोभीकरण करण्याचा स्तुत्य उपक्रम हाती घेण्यात आला आहे. चिपळूण पंचायत समितीच्या माजी सभापती तथा नूतन जिल्हा परिषद सदस्या सौ. पूजा शेखरजी निकम यांच्या पर्यावरणपूरक संकल्पनेतून या अभिनव मोहिमेची मुहूर्तमेढ रोवण्यात आली आहे. महामार्गालगतच्या सर्व्हिस रोडजवळील दुभाजकांवर आकर्षक व शोभिवंत वृक्षांची लागवड करून संपूर्ण परिसराचा कायापालट करणे आणि महामार्गाच्या कडेला एक समृद्ध हिरवागार पट्टा (ग्रीन बेल्ट) विकसित करणे, हा या उपक्रमामागील मुख्य उद्देश आहे. केवळ महामार्गाचे बाह्य सौंदर्य न वाढवता प्रत्यक्ष वृक्षसंवर्धनातून पर्यावरण रक्षणाचा प्रभावी संदेश सर्वसामान्य नागरिकांपर्यंत पोहोचवण्याचा हा एक प्रामाणिक प्रयत्न मानला जात आहे.
पर्यावरण संवर्धनासाठी सामूहिक सहभागाचे मोल अधोरेखित करणाऱ्या या मोहिमेत सह्याद्री शिक्षण संस्थेच्या अंतर्गत येणारे सीनियर कॉलेज, शरदचंद्रजी पवार उद्यानविद्या महाविद्यालय, इंग्रजी माध्यमाची शाळा तसेच गोविंदराव निकम माध्यमिक व उच्च माध्यमिक विद्यालय यांनी सक्रिय सहभाग नोंदवला आहे. विविध शैक्षणिक शाखांच्या योग्य समन्वयातून साकारलेला हा उपक्रम ‘झाडे लावा, झाडे वाचवा’ हा विचार प्रत्यक्ष कृतीतून रुजवण्यासाठी मैलाचा दगड ठरत आहे. मातृभूमीच्या रक्षणाची भावना विद्यार्थ्यांमध्ये खोलवर रुजवत निसर्गाचा समतोल राखण्याच्या दृष्टीने संस्थेने उचललेले हे पाऊल परिसराच्या सौंदर्यात मोलाची भर घालण्यासोबतच संपूर्ण समाजासाठी एक प्रेरणादायी आणि अनुकरणीय आदर्श निर्माण करणारे ठरले आहे. या वृक्षारोपण कार्यक्रमाप्रसंगी सौ. पूजाताई निकम, सावर्डे विद्यालयाचे प्राचार्य राजेंद्र वारे, पंचायत समिती सदस्य शौकतभाई माखजनकर यांच्यासह स्थानिक ग्रामस्थ, शिक्षक आणि विद्यार्थी मोठ्या संख्येने उपस्थित होते.
