रत्नागिरी : अशोक विजयादशमीचे औचित्य साधून तथागत गौतम बुद्धांचे मानवतावादी तत्त्वज्ञान, चक्रवर्ती सम्राट अशोकांचा धम्मविजय आणि भारतरत्न डॉ. बाबासाहेब आंबेडकरांनी दिलेला स्वातंत्र्य, समता, बंधुता व न्यायाचा संदेश जनमानसात रुजविण्यासाठी रत्नागिरीत ‘मंगल धम्म प्रभात – बुद्ध-धम्म स्वरआराधना’ या विशेष सांगीतिक व प्रबोधनपर कार्यक्रमाचे आयोजन करण्यात आले आहे. हा कार्यक्रम मंगळवार, २० ऑक्टोबर रोजी पहाटे ५.४५ वाजता विपश्यना ध्यान धारणा केंद्र, गयाळवाडी, खेडशी येथे संपन्न होणार आहे.
पहाटेच्या मंगल व शांत वातावरणात बुद्ध-धम्मावरील सुरेल व प्रबोधनपर गीतांच्या माध्यमातून तथागत बुद्धांची अथांग करुणा आणि प्रज्ञा, सम्राट अशोकांचा हिंसेकडून अहिंसेकडे आणि युद्धाकडून धम्माकडे झालेला वैचारिक प्रवास, तसेच डॉ. बाबासाहेब आंबेडकरांच्या ऐतिहासिक धम्मक्रांतीचा सामाजिक आशय उलगडण्याचा संकल्प या स्वरआराधनेतून करण्यात आला आहे. कार्यक्रमात सुप्रसिद्ध गायक दिलीप मोहिते, अमरदीप कदम आणि गायिका सिद्धी कासारे यांच्या सुमधुर आवाजात धम्मगीते सादर होणार असून संगीत संयोजन स्वतः दिलीप मोहिते सांभाळणार आहेत. त्यांना तबल्यावर गौरव पाटकर, सिंथेसायझरवर ओंकार आंबेकर तर तालवाद्यावर नागसेन कांबळे साथसंगत करणार आहेत.
कार्यक्रमाचे संयोजन व प्रभावी निवेदन सुशील जाधव करणार असून, या सोहळ्यास कवी, लेखक तथा नाट्य-चित्रपट दिग्दर्शक उदय जाधव यांची प्रमुख उपस्थिती लाभणार आहे. संतोष कासारे (मंडणगड) तसेच धम्मदीप मंडळ, गयाळवाडी (रत्नागिरी) यांच्या विशेष सहकार्यातून हा उपक्रम साकारला जात आहे. अशोक विजयादशमीचा दिवस मानवी जीवनात विवेक, अहिंसा, करुणा आणि बंधुभाव दृढ करणारा ठरावा या उदात्त हेतूने आयोजित केलेल्या या संगीत आणि वैचारिक प्रबोधनाच्या पहाट सोहळ्यास बहुसंख्येने उपस्थित राहावे, असे आवाहन आयोजकांच्या वतीने करण्यात आले आहे.
