बांधकाम सुरू असतानाही अविरत सेवेबद्दल कर्मचाऱ्यांची पाठ थोपटली
मालगुंड: प्राथमिक आरोग्य केंद्र मालगुंडच्या नवीन इमारतीचे बांधकाम सुरू असतानाही प्रतिकूल परिस्थितीवर मात करत नागरिकांना अविरत आणि दर्जेदार आरोग्य सेवा पुरविल्या जात असल्याबद्दल कोल्हापूर विभागाचे आरोग्य उपसंचालक डॉ. दिलीप माने यांनी समाधान व्यक्त केले आहे. डॉ. माने यांनी रविवार, १८ ऑक्टोबर २०२६ रोजी मालगुंड प्राथमिक आरोग्य केंद्राला भेट देऊन येथील दैनंदिन कामकाजाची आणि उपलब्ध सोयीसुविधांची सर्वांगीण पाहणी केली.
या दौऱ्यादरम्यान त्यांनी आरोग्य केंद्रामार्फत राबविण्यात येणाऱ्या विविध राष्ट्रीय आरोग्य योजना, रुग्णांना दिल्या जाणाऱ्या सेवा आणि आरोग्यविषयक अभिलेखांची सखोल तपासणी करून आढावा घेतला, तसेच ग्रामीण भागातील आरोग्य यंत्रणा अधिक लोकाभिमुख, परिणामकारक व गतिमान करण्याच्या दृष्टीने उपस्थित अधिकारी व कर्मचाऱ्यांना मौलिक सूचना करून मार्गदर्शन केले. बांधकामाच्या आव्हानात्मक काळातही आरोग्य सेवा अखंडित ठेवल्याबद्दल त्यांनी संपूर्ण वैद्यकीय पथकाच्या कार्यपद्धतीचे विशेष कौतुक केले.
या पाहणी दौऱ्यावेळी उपसंचालक कार्यालयाचे सांख्यिकी अधिकारी तेजस पारपोळकर, रत्नागिरीच्या तालुका आरोग्य अधिकारी डॉ. शीतल सूर्यवंशी, आरोग्य सहाय्यक परशुराम निवेंडकर, राहुल कोकणे, प्रमोद लिंगायत यांच्यासह प्राथमिक आरोग्य केंद्र मालगुंडच्या वैद्यकीय अधिकारी डॉ. सुनीता पवार, डॉ. ऋषिकेश डोके, आरोग्य सहाय्यक राजेंद्र रणसे, एलएचव्ही सीमा पाडवी, पीओ आस्वाद यादव, एलएसओ स्वप्नाली किनरे, मुख्यालय एएनएम स्वानंदी पवार, कनिष्ठ सहाय्यक विद्या मावळणकर, गणपतीपुळेचे एमपीडब्ल्यू विक्रम जाधव, सफाई कर्मचारी शैलेश जाधव, आशा गटप्रवर्तक श्रीमती आढाव, फ्लेबोटोमिस्ट श्रुतिका मोहित व राहुल जाधव यांच्यासह आरोग्य केंद्राचे सर्व कर्मचारी मोठ्या संख्येने उपस्थित होते. वरिष्ठ अधिकाऱ्यांच्या या प्रत्यक्ष पाहणी दौऱ्यामुळे कर्मचाऱ्यांचे मनोबल उंचावले असून, ग्रामीण जनतेला अधिक गुणवत्तापूर्ण आरोग्य सेवा पुरवण्यास नवी दिशा मिळाली आहे.
