संगमेश्वर : संगमेश्वर तालुक्यातील माभळे, कोळंबे, शिवणे, भिरकोंड आदी गावांमध्ये रानटी जनावरांच्या वाढत्या उपद्रवामुळे शेतीचे अतोनात नुकसान झाले असून, आधीच संकटात सापडलेला बळीराजा पूर्णपणे हवालदिल झाला आहे. यंदा संगमेश्वर तालुका दुष्काळग्रस्त म्हणून जाहीर झाल्यामुळे कमी पाऊस व प्रतिकूल नैसर्गिक परिस्थितीशी दोन हात करत शेतकऱ्यांनी पिके वाचवण्याचा आटोकाट प्रयत्न केला होता; मात्र आता थेट शेतात घुसून उभ्या पिकांची नासधूस करणाऱ्या वन्यजीवांमुळे शेतकऱ्यांसमोर शेती टिकवण्याचे गंभीर आव्हान उभे ठाकले आहे. अहोरात्र काबाडकष्ट करून उभे केलेले पीक डोळ्यांदेखत उद्ध्वस्त होत असल्याने ग्रामीण भागातील शेतकऱ्यांच्या मेहनतीवर पाणी फिरले असून, शेतकरी दुहेरी आर्थिक संकटाच्या कात्रीत सापडले आहेत.
ग्रामीण भागातील बहुतांश कुटुंबांचा उदरनिर्वाह केवळ शेतीवर अवलंबून असताना, सातत्याने होणारी नासाडी, वाढता उत्पादन खर्च आणि उत्पन्नाची कायमस्वरूपी अनिश्चितता यामुळे शेतकऱ्यांचे आर्थिक कंबरडे मोडले आहे. शेतातील पिकांचे रानटी जनावरांपासून संरक्षण कसे करावे, असा बिकट प्रश्न उभा राहिल्यामुळे शेती करावी की सोडून द्यावी, अशा विदारक व निराशाजनक मनःस्थितीत शेतकरी वर्ग पोहोचला आहे. या गंभीर परिस्थितीची प्रशासनाने तात्काळ दखल घ्यावी, नुकसानग्रस्त शेतीचे संबंधित विभागाने तातडीने प्रत्यक्ष जागेवर जाऊन पंचनामे करावेत आणि बाधित शेतकऱ्यांना सन्मानजनक नुकसानभरपाई उपलब्ध करून द्यावी, अशी जोरदार मागणी जोर धरत आहे; तसेच रानटी जनावरांचा हा वाढता उपद्रव कायमस्वरूपी रोखण्यासाठी वन विभागाने तातडीने ठोस आणि परिणामकारक उपाययोजना राबवाव्यात, अशी आग्रही अपेक्षाही त्रस्त ग्रामस्थांकडून व्यक्त करण्यात येत आहे.
