कुडाळ: सण-उत्सवाच्या मंगल दिनी नियतीने घातलेला घाला आणि डोळ्यांसमोर उभा ठाकलेला साक्षात मृत्यू, अशा थरारक व काळजाचा ठोका चुकवणाऱ्या संकटातून शेलटेवाडीतील ग्रामस्थांनी एका मातेसह तिच्या मुलाला जीवनदान दिले. कुडाळ शहरातील हॉटेल गुलमोहोरनजीक असलेल्या भंगसाळ नदी बंधाऱ्यावरून जात असताना अचानक तोल जाऊन दुचाकी थेट खोल नदीपात्रात कोसळल्याची हृदयद्रावक घटना दसऱ्याच्या दिवशी भरदुपारी पावणेतीन वाजण्याच्या सुमारास घडली. या भीषण अपघातात १९ वर्षीय दुचाकीस्वार निखिल नारायण सावंत आणि त्याच्या मागे बसलेली त्याची आई नेहा नारायण सावंत (वय ४५, रा. आंबडपाल) हे दोघेही गाडीसह थेट पाण्याच्या प्रवाहात फेकले गेले. पाण्याच्या डोहात बुडत असताना त्यांनी जीव वाचवण्यासाठी फोडलेला आक्रोशाचा टाहो ऐकून परिसरातील ग्रामस्थांनी क्षणाचाही विलंब न लावता दाखवलेल्या अतुलनीय धाडसामुळे एका निष्पाप कुटुंबाचा संसार उघड्यावर पडता पडता वाचला.
लघु पाटबंधारे विभागामार्फत या बंधाऱ्यावर पाणी साठवणुकीसाठी लोखंडी प्लेट्स बसवण्याचे काम हाती घेण्यात आले असून या जड प्लेट्स बंधाऱ्यावरच ठेवण्यात आल्या होत्या. या अरुंद आणि कामाच्या साहित्याने व्यापलेल्या बंधाऱ्यावरून जात असताना दुचाकीचा ताबा सुटला आणि क्षणार्धात ही दुर्दैवी दुर्घटना घडली. दोघेही नदीच्या प्रवाहात बुडत असल्याचे आणि त्यांचा आर्त टाहो कानावर पडताच शेलटेवाडीतील स्थानिक युवक प्रसाद शेलटे, नारायण शेलटे, अक्षय शेलटे, उमेश शेलटे आणि महेश शेलटे यांनी स्वतःच्या प्राणांची तमा न बाळगता थेट नदीपात्रात उड्या घेतल्या. या देवदूतांनी कमालीचे प्रसंगावधान राखून आई आणि मुलाला पाण्याच्या प्रवाहातून सुखरूप बाहेर काढत मृत्यूच्या दारातून माघारी आणले.
या गंभीर अपघातात दोघेही जखमी झाले असून त्यांना तातडीने कुडाळ ग्रामीण रुग्णालयात दाखल करण्यात आले. तेथे प्राथमिक वैद्यकीय उपचार केल्यानंतर मातेची प्रकृती चिंताजनक असल्याने नेहा सावंत यांना अधिक उपचारासाठी सिंधुदुर्गनगरी येथील जिल्हा रुग्णालयात हलवण्यात आले. खोल पाण्यात बुडालेली दुचाकीही ग्रामस्थांनी जेटीच्या साहाय्याने अथक परिश्रम करून बाहेर काढली. दरम्यान, या बंधाऱ्यावरून दुचाकींची सातत्याने मोठी वर्दळ सुरू असतानाही सुरक्षिततेच्या बाबतीत दाखवले गेलेले दुर्लक्ष अशा जीवघेण्या अपघातांना निमंत्रण देत असल्याचा संतप्त सूर व्यक्त होत असून, ग्रामस्थांनी दाखवलेल्या समयसूचकतेमुळेच दसऱ्याच्या सणाला एका आई-मुलाचा जीव वाचल्याने त्यांचे सर्वत्र भरभरून कौतुक होत आहे.
