ठाणे: परराज्यातून रेल्वेमार्गे होणाऱ्या अवैध मद्यतस्करीवर राज्य उत्पादन शुल्क विभागाने मंगळवारी मोठी कारवाई करत मंगळुरू एक्सप्रेसमधून उतरलेल्या एका रेल्वे अटेंडंटला रंगेहाथ बेड्या ठोकल्या. ठाणे रेल्वे स्थानकावरील फलाट क्रमांक ८ वर रचलेल्या सापळ्यात आरोपी शिवम छनबस मठपती याच्याकडून ७१ हजार ५६० रुपये किमतीच्या गोवा बनावटीच्या नामांकित विदेशी मद्याचा साठा जप्त करण्यात आला. प्रवाशांच्या सेवेसाठी मिळालेल्या पदाचा गैरवापर करून स्वतःच्या मोठ्या बॅगांमधून ही बेकायदा वाहतूक करणाऱ्या या आरोपीला न्यायालयाने एक दिवसाची उत्पादन शुल्क कोठडी सुनावली आहे.
मंगळुरू एक्सप्रेसमधून गोव्यातील विदेशी दारूची मोठी खेप ठाण्यात उतरवली जाणार असल्याची गुप्त माहिती उत्पादन शुल्क विभागाच्या गस्ती पथकाला मिळाली होती. त्यानुसार गाडी क्रमांक १२१३४ मंगळुरू एक्सप्रेस दुपारी सव्वा बाराच्या सुमारास फलाटावर येताच, दोन संशयास्पद मोठ्या बॅगा घेऊन उतरणाऱ्या इसमाला अधिकाऱ्यांनी ताब्यात घेतले. चौकशीअंती तो रेल्वे अटेंडंट असल्याचे निष्पन्न झाले असून त्याच्या बॅगांची झडती घेतली असता, केवळ गोव्यात विक्रीसाठी परवानगी असलेल्या महागड्या विदेशी मद्याच्या बाटल्यांचा मोठा साठा आढळून आला.
राज्य उत्पादन शुल्क आयुक्त डॉ. राजेश देशमुख, सहआयुक्त प्रसाद सुर्वे, कोकण विभागीय उपआयुक्त प्रदीप पवार आणि ठाणे अधीक्षक प्रवीण तांबे यांच्या मार्गदर्शनाखाली उपअधीक्षक तथा निरीक्षक आनंद पवार यांच्या पथकाने ही यशस्वी कारवाई पार पाडली. आरोपीविरुद्ध दारूबंदी कायद्यान्वये गुन्हा दाखल करण्यात आला असून, हा अवैध साठा गोव्यातून नेमका कोठून भरण्यात आला, ठाण्यात तो कोणाला पुरवला जाणार होता आणि यामागे मोठे आंतरराज्यीय रॅकेट कार्यरत आहे का, या दिशेने तपास यंत्रणेने सखोल चौकशी सुरू केली आहे.
