रत्नागिरी: रत्नागिरी जिल्हा परिषदेच्या माध्यमिक शिक्षणाधिकारीपदाची धुरा शिक्षण क्षेत्रातील ३५ वर्षांचा प्रदीर्घ अनुभव असलेले नागनाथ शिंदे यांच्याकडे सोपवण्यात आली आहे. २२ ऑक्टोबर २०२६ पासून त्यांनी या पदाची सूत्रे स्वीकारली आहेत. त्यांच्या या नियुक्तीमुळे मागील काही काळापासून या पदाचा अतिरिक्त कार्यभार सांभाळत असलेले उपशिक्षणाधिकारी दीपक मेंगाणे आता पुन्हा आपल्या मूळ उपशिक्षणाधिकारी पदावर कार्यरत राहणार आहेत.
नागनाथ शिंदे यांनी आपल्या सेवाकाळात शिक्षकापासून विविध उच्च पदांपर्यंत उत्कृष्ट सेवा बजावली आहे. त्यांनी १९९१ ते २००६ या काळात अहिल्यानगर जिल्ह्यातील जामखेड येथे प्राथमिक शिक्षक म्हणून काम केले. त्यानंतर २००६ ते २०११ दरम्यान श्रीरामपूर पंचायत समितीत शिक्षण विस्तार अधिकारी, २०११ ते २०१५ मध्ये गेवराई, तर २०१५ ते २०१९ मध्ये अंबाजोगाई येथे गटशिक्षणाधिकारी म्हणून जबाबदारी सांभाळली. तसेच २०१९ ते २०२२ या काळात पुन्हा जामखेड येथे गटशिक्षणाधिकारी म्हणून त्यांनी काम पाहिले. यानंतर २०२२ ते २०२५ या कालावधीत जिल्हा परिषद, बीड येथे माध्यमिक शिक्षणाधिकारी आणि २०२५ ते ऑक्टोबर २०२६ पर्यंत लातूर येथे प्राथमिक शिक्षणाधिकारी म्हणून त्यांनी सेवा बजावली आहे. या व्यापक अनुभवाच्या पार्श्वभूमीवर आता त्यांची रत्नागिरीच्या माध्यमिक शिक्षणाधिकारीपदी वर्णी लागली आहे.
मागील वर्षभरात माध्यमिक शिक्षणाधिकारी पदाचा अतिरिक्त कार्यभार सांभाळताना दीपक मेंगाणे यांनी पदाची प्रतिष्ठा राखत पारदर्शक, गतिमान आणि लक्षवेधी कामकाजावर भर दिला. शिक्षक, शिक्षकेतर कर्मचारी आणि शिक्षण व्यवस्थेला न्याय देण्याचा त्यांनी यशस्वी प्रयत्न केला.
दरम्यान, शांत स्वभावाचे आणि शिस्तप्रिय अधिकारी म्हणून ओळख असलेल्या नागनाथ शिंदे यांच्या नियुक्तीचे शिक्षण विभागातील कर्मचारी आणि विविध शिक्षक संघटनांनी स्वागत केले आहे.पदभार स्वीकारल्यानंतर दीपक मेंगाणे, संदेश कडव यांच्यासह माध्यमिक शिक्षण विभागातील अन्य कर्मचाऱ्यांनी शिंदे यांना पुष्पगुच्छ देऊन हार्दिक शुभेच्छा दिल्या.
