मुंबई / तुषार पाचलकर : शिवसेना नेते तथा माजी आमदार राजन साळवी यांच्यावर नुकतीच यशस्वी बायपास शस्त्रक्रिया पार पडली असून सध्या ते रुग्णालयात उपचार घेत आहेत. या पार्श्वभूमीवर रायगड जिल्ह्याचे पालकमंत्री भरत गोगावले यांनी रुग्णालयात प्रत्यक्ष जाऊन राजन साळवी यांची सदिच्छा भेट घेतली आणि त्यांच्या तब्येतीची आस्थेने विचारपूस केली.
या भेटीदरम्यान मंत्री गोगावले यांनी उपस्थित डॉक्टरांशी सविस्तर चर्चा करून साळवी यांच्या प्रकृतीतील सुधारणा, शस्त्रक्रियेनंतरची सद्यस्थिती आणि सुरू असलेल्या वैद्यकीय उपचारांची माहिती जाणून घेतली. राजकीय क्षेत्रातील मतभेद बाजूला ठेवून घेतलेल्या या भेटीने राजकीय वर्तुळात सौहार्दाचे वातावरण पाहायला मिळाले. राजन साळवी यांनी या आजारपणातून लवकरात लवकर पूर्णपणे बरे व्हावे आणि पुन्हा एकदा पूर्ण ताकदीने जनसेवेत सक्रिय व्हावे, अशा सदिच्छा यावेळी मंत्री भरत गोगावले यांनी व्यक्त केल्या. साळवी यांची प्रकृती सध्या स्थिर असून त्यांच्या प्रकृतीत वेगाने सुधारणा होत असल्याचे डॉक्टरांकडून सांगण्यात आले आहे.
