रत्नागिरी : शहरातील कोकणनगर, राधाकृष्ण नगर परिसरामध्ये भरदिवसा घरफोडीची घटना उघडकीस आली असून अज्ञात चोरट्याने बंद घराच्या खिडकीचे लॉक तोडून घरात प्रवेश करत तब्बल दोन लाख वीस हजार रुपयांची रोख रक्कम लंपास केली आहे. याप्रकरणी रत्नागिरी शहर पोलीस ठाण्यात अज्ञात चोरट्याविरोधात गुन्हा दाखल करण्यात आला आहे. फिर्यादी महेक अबरार हाजु (वय ४०, रा. राधाकृष्ण नगर, कोकणनगर, रत्नागिरी) यांचे कुटुंब घरात नसताना दिनांक २७ ऑक्टोबर २०२६ रोजी दुपारी १२.०० ते २८ ऑक्टोबर २०२६ रोजी सकाळी ११.३० या कालावधीत ही चोरीची घटना घडली.
अज्ञात चोरट्याने बंद घराच्या हॉलमधील स्लायडिंग खिडकीचे कायमस्वरूपी लॉक कोणत्या तरी हत्याराने उचकटून आत प्रवेश केला. त्यानंतर बेडरूममध्ये ठेवलेल्या पत्र्याच्या पेटीचे लॉक कडीसह तोडून त्यातील २ लाख २० हजार रुपयांची रोख रक्कम चोरून नेली. कुटुंबीय घरी परतल्यानंतर हा प्रकार उघडकीस आला. या घटनेची तक्रार प्राप्त होताच रत्नागिरी शहर पोलिसांनी अज्ञात आरोपीविरुद्ध भारतीय न्याय संहिता २०२३ चे कलम ३३१(३), ३३१(४) आणि ३०५(अ) अन्वये गुन्हा नोंदवला असून पोलीस परिसरातील सीसीटीव्ही फुटेज आणि इतर पुराव्यांच्या आधारे अज्ञात चोरट्याचा कसून शोध घेत आहेत. भरवस्तीत घडलेल्या या धाडसी घरफोडीमुळे परिसरात नागरिकांमध्ये खळबळ उडाली आहे.
