रत्नागिरी/ अमित कांबळे: रत्नागिरी तालुक्यातील बौद्धजन पंचायत समिती कळझोंडी पंचशील नगर शाखा क्रमांक ११ च्या वतीने अशोका विजयादशमीनिमित्त ७० वा धम्मचक्र प्रवर्तन दिन विविध धार्मिक व सामाजिक उपक्रमांनी अत्यंत मंगलमय वातावरणात साजरा करण्यात आला. शाखेचे अध्यक्ष अनिल पवार गुरुजी यांच्या अध्यक्षतेखाली झालेल्या या सोहळ्यास रत्नागिरी तालुका बौद्धजन पंचायत समितीचे अध्यक्ष प्रकाश पवार, प्रमुख वक्त्या तथा बौद्धाचार्या करुणा पवार, उपाध्यक्ष संदीप पवार, सभापती प्रकाश पवार, सल्लागार किशोर पवार, सेक्रेटरी सुभाष पवार, ज्येष्ठ कला शिक्षक उत्तम पवार, महिला मंडळ सभापती नम्रता पवार, उपाध्यक्षा संपदा पवार, सेक्रेटरी रीना पवार, सहसचिव करुणा पवार, सल्लागार मयुरी पवार तसेच ज्येष्ठ शिक्षिका अश्विनी अनिल पवार यांच्यासह परिसरातील समाजबांधव मोठ्या संख्येने उपस्थित होते. मान्यवरांच्या हस्ते पंचशील धम्म ध्वज आणि निळ्या ध्वजाचे विधिवत ध्वजारोहण करून महापुरुषांच्या जयघोषाने संपूर्ण परिसर दुमदुमून गेला. त्यानंतर महामानव भगवान गौतम बुद्ध, सम्राट अशोक, डॉ. बाबासाहेब आंबेडकर, महात्मा जोतीराव फुले, छत्रपती शिवाजी महाराज, क्रांतीज्योती सावित्रीबाई फुले आणि माता रमाई यांच्या प्रतिमांना पुष्पहार अर्पण करून दीप प्रज्वलन करण्यात आले, तसेच बौद्धाचार्या करुणा पवार व दीक्षा पवार यांच्या पौरोहित्याखाली धार्मिक पूजापाठ संपन्न झाला.
कार्यक्रमाच्या दुसऱ्या टप्प्यात आयोजित अभिवादन सभेत राजरत्न पवार, अनुप पवार, श्रावस्ती पवार, सोनाली पवार, रीना पवार, किशोर पवार, सुभाष पवार, प्रकाश पवार आणि अध्यक्ष अनिल पवार यांनी डॉ. बाबासाहेब आंबेडकर यांच्या ऐतिहासिक धम्मक्रांतीवर सविस्तर प्रकाश टाकून उपस्थितांना मार्गदर्शन केले. सभेच्या समाप्तीनंतर शाखाध्यक्ष अनिल पवार गुरुजी व त्यांच्या कुटुंबीयांच्या वतीने उपस्थित सर्व धम्मबांधवांसाठी सामुदायिक भोजनदानाचे आयोजन करण्यात आले होते. दुपारच्या सत्रात सायंकाळी ४ वाजता कळझोंडी पंचशील बुद्ध विहारापासून डॉ. बाबासाहेब आंबेडकर नगर, सिद्धार्थनगर, सुंदरवाडी मार्गे पुन्हा पंचशील बुद्ध विहारापर्यंत महामानवांच्या प्रतिमांची भव्य मिरवणूक काढण्यात आली. बॅन्जोवरील धम्म क्रांतीगीतांच्या सुरावटी, ढोल-ताशांचा गजर आणि पारंपरिक लेझीम पथकाच्या तालावर निघालेल्या या रॅलीचे नेतृत्व अध्यक्ष अनिल पवार यांच्यासह प्रकाश पवार, सुभाष पवार, संदीप पवार, किशोर पवार, नम्रता पवार, मयुरी पवार आणि शितल पवार यांनी केले. विशाल पवार आणि युवक मंडळाच्या सहकार्याने यशस्वी झालेल्या या धम्म रॅलीनंतर सायंकाळी ७ वाजता बुद्ध विहारात सामुदायिक त्रिशरण, पंचशील ग्रहण आणि शरणत्तय गाथेच्या पठणाने संपूर्ण कार्यक्रमाची सांगता झाली.
