चौपदरीकरणानंतरही अवजड वाहनांचे अपघात सुरूच; तीव्र उतार आणि धोकादायक वळणांमुळे वाहनचालकांची कसरत
लांजा/अरबाज नेवरेकर : मुंबई-गोवा राष्ट्रीय महामार्गावरील लांजा तालुक्यातील वेरळ घाट हा एकेकाळी अपघातांसाठी कुप्रसिद्ध होता. महामार्गाच्या चौपदरीकरणामुळे या घाटातील धोकादायक वळणे कमी झाल्याने वाहनचालकांना दिलासा मिळाला आहे. मात्र, आता अंजणारी घाटात अवजड वाहनांच्या अपघातांचे प्रमाण वाढू लागल्याने हा घाट नवीन अपघातप्रवण क्षेत्र म्हणून समोर येत आहे. विशेषतः मठ ते अंजणारी काजळी नदी पुलादरम्यान असलेला तीव्र उतार वाहनचालकांसाठी धोकादायक ठरत आहे.
मुंबई-गोवा महामार्गावर लांजा तालुक्याच्या हद्दीत अंजणारी, वेरळ आणि वाकेड हे तीन घाट आहेत. यापैकी वेरळ घाटातील तीव्र वळणे आणि अरुंद रस्त्यांमुळे यापूर्वी अनेक भीषण अपघात घडले होते. या घाटात दीडशेहून अधिक लहान-मोठ्या अपघातांची नोंद झाल्याचे सांगितले जाते. तसेच, शंभरहून अधिक प्रवाशांना आपले प्राण गमवावे लागले होते. तब्बल २२ वेळा अवजड कंटेनर अडकण्याच्या घटनाही घडल्या होत्या. परिणामी, वारंवार वाहतूक कोंडी होऊन महामार्ग पोलीस आणि संबंधित यंत्रणांना मोठी कसरत करावी लागत होती.
महामार्गाच्या चौपदरीकरणात वेरळ घाटातील धोकादायक यू-आकाराचे वळण आणि घाटाचा काही भाग कमी करण्यात आल्याने येथील वाहतूक तुलनेने सुरळीत झाली आहे. मात्र, वेरळ घाटातील समस्या कमी होत असतानाच अंजणारी घाटात अपघातांची मालिका सुरू झाल्याने वाहनचालकांसह स्थानिक नागरिकांमध्ये चिंता व्यक्त होत आहे.
अंजणारी घाटातील मठ परिसरापासून काजळी नदीवरील पुलापर्यंत रस्त्याला तीव्र उतार आहे. विशेषतः गोव्याच्या दिशेने जाणाऱ्या मार्गिकेवर अवजड वाहनांचा वेग नियंत्रित करणे चालकांसाठी आव्हानात्मक ठरत आहे. याच परिसरात कंटेनर आणि ट्रकचे वारंवार अपघात घडत आहेत. गेल्या आठवडाभरात चार, तर महिनाभरात सहा अपघात एकाच परिसरात घडल्याचे समोर आले आहे. या घटनांमुळे वाहतूक विस्कळीत होण्याबरोबरच इतर वाहनचालकांच्या सुरक्षिततेचाही प्रश्न निर्माण झाला आहे.
सततच्या अपघातांच्या पार्श्वभूमीवर महामार्ग विभागाने अंजणारी घाटातील तीव्र उतारावर वाहनांचा वेग नियंत्रित करण्यासाठी उपाययोजना सुरू केल्या आहेत. काही ठिकाणी बॅरिकेड्स आणि गतिरोधकांची व्यवस्था करण्यात आली आहे. मात्र, या उपाययोजना कितपत प्रभावी ठरतील, याबाबत प्रश्न उपस्थित होत आहेत. कारण चौपदरीकरणापूर्वीही या भागात गतिरोधक उभारण्यात आले होते. तरीदेखील अपघात रोखण्यात अपेक्षित यश मिळाले नव्हते.
दरम्यान, अंजणारी घाटातील रस्त्याच्या रचनेबाबतही नागरिक आणि वाहनचालकांकडून प्रश्न उपस्थित केले जात आहेत. घाटातील तीव्र उतार आणि वळणांची तीव्रता कमी करण्याच्या दृष्टीने योग्य नियोजन झाले असते, तर अपघातांचा धोका कमी करता आला असता, असे मत व्यक्त होत आहे. तसेच काजळी नदीवरील ब्रिटिशकालीन पुलाशेजारी उभारण्यात आलेल्या नवीन पुलाच्या जागेचे नियोजन वेगळ्या पद्धतीने केले असते, तर धोकादायक वळण टाळता आले असते, अशाही प्रतिक्रिया उमटत आहेत.
मुंबई-गोवा महामार्गाच्या चौपदरीकरणामुळे प्रवास अधिक सुरक्षित आणि वेगवान होण्याची अपेक्षा असताना अंजणारी घाटातील वाढते अपघात चिंतेचा विषय बनले आहेत. त्यामुळे केवळ तात्पुरत्या उपाययोजनांवर अवलंबून न राहता घाटातील रस्त्याची रचना, उतार, वळणे आणि अवजड वाहनांच्या सुरक्षिततेचा सखोल अभ्यास करून कायमस्वरूपी उपाययोजना करण्याची मागणी नागरिक व वाहनचालकांकडून होत आहे.
